Breaking: పృథ్వీపై జగన్ సర్కార్ వేటు.. ఎస్వీబీసీ చైర్మన్ పదవికి రాజీనామా

మహిళా ఉద్యోగితో అనుచిత సంభాషణ సినీనటుడు, ఎస్వీబీసీ చైర్మన్ పృధ్వీ పదవికి ఎసరు పెట్టింది. రాసలీలల ఆడియో టేపుల వ్యవహారం మెడకు చుట్టుకుంది. ధార్మిక సంస్థలో ఇలాంటి ఘటనలు చోటుచేసుకోవడంపై జగన్ సర్కార్ సీరియస్‌గా స్పందించింది. ఎస్వీబీసీ చైర్మన్ పృథ్వీపై వేటు వేసింది. ఆయనను తన పదవికి రాజనామా చేయాలని ఆదేశించింది.

సీఎం జగన్ ఆదేశాల మేరకు టీటీడీ చైర్మన్ వైవీ సుబ్బారెడ్డి రాజీనామా చేయాలని పృథ్వీని ఆదేశించారు. అధిష్టానం ఆదేశాలతో ఆయన రాజీనామా చేశారు. హైదరాబాద్ ప్రెస్‌క్లబ్‌లో మీడియా సమావేశంలో పృథ్వీ మాట్లాడుతూ తన పదవికి రాజీనామా చేస్తున్నట్లు ప్రకటించారు. పక్కా ప్లాన్ ప్రకారమే తనను టార్గెట్ చేశారని ఆయన సంచలన ఆరోపణలు చేశారు. ఆడియో టేపులతో తనకెలాంటి సంబంధం లేదని.. ఉద్దేశపూర్వకంగా జరిగిన కుట్రగా అభివర్ణించారు. తనపై ఆరోపణలు వచ్చినందునే రాజీనామా చేస్తున్నానని ఆయన స్పష్టం చేశారు.

Also Read: నాకు పదవి ఇచ్చారనే.. ఆడియో లీకేజీపై పృథ్వీ షాకింగ్ కామెంట్స్

ఆడియో టేపుల వ్యవహారాన్ని సీరియస్‌గా తీసుకున్న టీటీడీ ఇప్పటికే విజిలెన్స్ విచారణకు ఆదేశించింది. ఎస్వీబీసీలో పని చేస్తున్న మహిళా ఉద్యోగితో అనుచిత సంభాషణ ఆడియో సోషల్ మీడియాలో వైరల్ కావడంతో టీటీడీ స్పందించింది. టీటీడీ చైర్మన్ వైవీ సుబ్బారెడ్డి తక్షణం విజిలెన్స్ విచారణకు ఆదేశించారు. ఆడియో టేపులను ఫోరెన్సిక్ పరీక్షలకు పంపినట్లు తెలుస్తోంది. విజిలెన్స్ నివేదిక వచ్చిన తరువాత తదుపరి చర్యలు ఉంటాయని ఆయన తెలిపారు.

టీటీడీ విజిలెన్స్ విచారణకు ఆదేశించడంతో పోలీసులు రంగప్రవేశం చేశారు. ఎస్వీబీసీ కార్యాలయానికి వెళ్లి ఉద్యోగుల నుంచి వివరాలు సేకరిస్తున్నారు. పృధ్వీ వ్యవహారశైలి తదితర విషయాలపై ఆరా తీస్తున్నారు. విజిలెన్స్ విచారణ అనంతరం తప్పని తేలితే సీఎం జగన్‌ ఆదేశాల మేరకు చర్యలు తీసుకుంటామని వైవీ ఇప్పటికే స్పష్టం చేసిన కొద్దిసేపటికే పృథ్వీపై వేటు పడింది. పదవికి రాజీనామా చేయాలని ఆదేశాలందాయి.

Read Also: ఎస్వీబీసీ చైర్మన్ పృధ్వీకి షాక్.. రాసలీలల బాగోతంపై టీటీడీ కీలక ఆదేశాలు