ఇప్పుడు టిడ్కో వంతు.. జగన్ సర్కార్ ‘రివర్స్‌’ దూకుడు

జగన్ సర్కార్ రివర్స్ టెండరింగ్‌లో దూసుకెళ్తోంది. గత ప్రభుత్వ హయాంలో ఖరారు చేసిన ప్రాజెక్టుల్లో భారీగా అవినీతి జరిగిందని.. మళ్లీ రివర్స్ టెండరింగ్ విధానంలో టెండర్లు నిర్వహించనున్నట్లు ప్రభుత్వం గతంలోనే ప్రకటించింది. అందులో భాగంగా పోలవరం ప్రాజెక్టు సహా ప్రధాన ఇరిగేషన్ ప్రాజెక్టులకు రివర్స్ టెండరింగ్ నిర్వహించింది. అదే విధానాన్ని అన్ని ప్రభుత్వ శాఖలకు కూడా వర్తింపజేసింది. గ్రామ సచివాలయాల ఫర్నిచర్ కోసం నిర్వహించిన టెండర్లలోనూ రివర్స్ విధానాన్ని అనుసరించింది.

ఇప్పుడు పట్టణ గృహనిర్మాణ శాఖ (టిడ్కో) వంతు వచ్చింది. టిడ్కో రివర్స్ టెండరింగ్‌లో ప్రభుత్వానికి భారీగా నిధులు ఆదా అయ్యాయి. రాష్ట్రంలోని చిత్తూరు, కృష్ణా, విశాఖపట్నం, విజయనగరం జిల్లాలకు కేటాయించిన గృహాల నిర్మాణానికి నిర్వహించిన రివర్స్ టెండర్లలో రూ.106 కోట్లు ఆదా అయినట్లు మంత్రి బొత్స సత్యనారాయణ తెలిపారు. కేవలం నాలుగు జిల్లాలకే అంత పెద్ద మొత్తం ఆదా అయినట్లు ఆయన చెప్పారు.

Also Read: సీఎం జగన్‌‌కు ముప్పు.. మాజీ మంత్రి కుట్రపన్నారు.. వైసీపీ నేత సంచలన ఆరోపణలు

చిత్తూరు, కృష్ణా, విశాఖపట్నం, విజయనగరం జిల్లాల్లో టిడ్కో ద్వారా కేటాయించిన 14,368 యూనిట్లకు రూ.707.3 కోట్లు ఖర్చవుతుందని ప్రభుత్వం అంచనా వేసింది. రివర్స్ టెండరింగ్‌లో రూ.606.12 కోట్లకే పనులు చేస్తామని కంపెనీలు ముందుకొచ్చినట్లు మంత్రి తెలిపారు. దాంతో ప్రభుత్వ ఖజానాకు రూ.105.91 కోట్లు మిగిలాయని చెప్పారు.

అవినీతిని నియంత్రించేందుకే పేదలకు ఉచితంగా ఇళ్లు కట్టించి ఇచ్చే పథకానికి ప్రభుత్వం పూనుకుందన్నారు. గత ప్రభుత్వంలో మాదిరి పాత రేట్లకు టెండర్లు పిలిచి ఉంటే రాష్ట్ర ప్రజలకు ఒక్కొక్కరిపై రూ.75 వేల నుంచి రూ.95 వేల వరకు భారం పడేదని బొత్స అన్నారు. రివర్స్ టెండరింగ్‌తో లబ్ధిదారులకు భారీ లబ్ధి జరిగిందని వ్యాఖ్యానించారు. డిసెంబర్‌లో 65,998 ఇళ్లకు రూ.3,258 కోట్లతో టెండర్లు పిలవనున్నట్లు ప్రకటించారు.

Read Also: సొంత చెల్లెలిపై అన్న అత్యాచారం.. విజయవాడలో దారుణం