కాపు ఉద్యమ కేసులు ఉపసంహరణ.. జగన్ సర్కార్ కీలక నిర్ణయం

మాజీ మంత్రి ముద్రగడ పద్మనాభం నాయకత్వంలో గత తెలుగు దేశం పార్టీ హయాంలో జరిగిన కాపు రిజర్వేషన్ల ఉద్యమానికి సంబంధించి కీలక పరిణామం చోటుచేసుకుంది. కాపు ఉద్యమంలో భాగంగా 2016 జనవరిలో నిర్వహించిన తుని కార్యక్రమంలో పలువురు ఆందోళనకారులు రైలుకు నిప్పుపెట్టారు. ఈ ఘటనకు సంబంధించి మరో 17 కేసులల్లో విచారణను ఉపసంహరించుకుంటూ ఆంధ్రప్రదేశ్‌ ప్రభుత్వం ఉత్తర్వులు జారీ చేసింది.

తూర్పు గోదావరి జిల్లా తుని రూరల్ పోలీస్ స్టేషన్‌లో నమోదైన 17 కేసులను ఉపసంహరిస్తున్నట్లు హోంశాఖ కార్యదర్శి కుమార్‌ విశ్వజిత్‌ సోమవారం ఉత్తర్వులు జారీ చేశారు. డీజీపీ సిఫార్సుల మేరకు ఈ కేసులను ఉపసంహరిస్తున్నట్లు తెలిపారు. రైలును తగులబెట్టిన ఘటనకు సంబంధించి మొత్తం 69 కేసులు నమోదు కాగా, ఇప్పటికే 51 కేసులను గతేడాది వైసీపీ ప్రభుత్వం ఉపసంహరించుకున్న విషయం తెలిసిందే.

కాగా, కాపులకు రిజర్వేషన్లు కల్పించాలని కోరుతూ ముద్రగడ పద్మనాభం నాయకత్వంలో గత టీడీపీ ప్రభుత్వ హయాంలో ఆ కులస్తులు పెద్ద ఎత్తున ఉద్యమించిన విషయం తెలిసిందే. ఈ క్రమంలోనే 2016 జనవరిలో తుని కార్యక్రమంలో ఆందోళనకారులు రైలుకు నిప్పుపెట్టడంతో ఉద్యమం హింసాత్మకంగా మారింది. దీనిపై అప్పటి ప్రభుత్వం మొత్తం 69 కేసులను నమోదు చేసింది. గత ఎన్నికల సమయంలో ఆ ఘటనకు సంబంధించి కేసులను మాఫీ చేస్తానని ప్రకటించిన ముఖ్యమంత్రి వైఎస్ జగన్మోహన్ రెడ్డి ఇచ్చిన మాట ప్రకారం మొత్తం కేసులను ఉపసంహరించుకున్నారు.