Petrol Price Hike: ఏపీ ప్రజలకు షాక్.. పెట్రోల్, డీజిల్‌పై వ్యాట్ పెంచిన జగన్ సర్కారు

అమ్మ ఒడి, రైతు బంధు, నేతన్న నేస్తం తదితర సంక్షేమ పథకాలతో జగన్ సర్కారు.. ‘రాజన్న పాలన’ను మళ్లీ తీసుకొచ్చింది. సంక్షేమమే ప్రథమ ప్రాధాన్యంగా జగన్ పాలన చేపడుతున్నారు. కానీ ఓవైపు ఆర్థిక అనిశ్చితి పరిస్థితులు, మరోవైపు అప్పుల భారం ఏపీ ఆర్థిక వ్యవస్థను భయపెడుతున్నాయి. జీతాలు ఇవ్వడానికి కూడా ఇబ్బంది పడాల్సిన పరిస్థితి ఉందనే మాట కూడా వినిపిస్తోంది. ఇలాంటి తరుణంలో.. ఆదాయాన్ని పెంచుకోవడంపై జగన్ సర్కారు ఫోకస్ చేసింది.

పెట్రోల్, డీజిల్‌లపై వ్యాట్ పెంచుతూ ఏపీ ప్రభుత్వం నిర్ణయం తీసుకుంది. పెట్రోల్‌పై ఇప్పటి వరకూ 31 శాతం వ్యాట్ వసూలు చేస్తుండగా.. దాన్ని 35.20 శాతానికి పెంచారు. డీజిల్‌పై 22.25 శాతం వ్యాట్ వసూలు చేస్తుండగా దాన్ని 27 శాతానికి పెంచారు. ఈ నిర్ణయం కారణంగా పెట్రోల్, డీజిల్‌ ధర లీటర్‌కు రూ.2 చొప్పున పెరగనుంది. ఈ మేరకు ఏపీ ప్రభుత్వం జీవో జారీ చేసింది.

వాస్తవానికి పొరుగున ఉన్న కర్ణాటకతో పోలిస్తే ఏపీ, తెలంగాణల్లోనే పెట్రోల్, డీజిల్‌లపై వ్యాట్ బాదుడు ఎక్కువగా ఉంది. పొరుగు రాష్ట్రంతో పోలిస్తే మన దగ్గర పెట్రోల్ ధర ఎక్కువగా ఉంటోంది. పెట్రోల్ ధరలు విపరీతంగా పెరిగిపోతుండటంతో 2018 సెప్టెంబర్‌లో పెట్రోల్, డీజిల్‌పై రూ.2 పన్ను తగ్గిస్తూ నాటి చంద్రబాబు సర్కారు నిర్ణయం తీసుకుంది.

గురువారం నాటికి ఢిల్లీలో లీటర్ పెట్రోల్ ధర రూ.73.36 పైసలు ఉండగా.. డీజిల్ ధర రూ.66.36 పైసలు ఉంది. ముంబైలో పెట్రోల్ ధర రూ.78.97 ఉండగా.. డీజిల్ ధర రూ.69.56గా ఉంది. అమరావతిలో పెట్రోల్‌ ధర రూ.77.94గా ఉంది. డీజిల్‌ ధర రూ.72.27గా ఉంది. విజయవాడలో లీటర్ పెట్రోల్ ధర రూ.77.56 ఉండగా.. డీజిల్ ధర రూ.71.91గా ఉంది.

Read Also: ‘ఐ లవ్ అమరావతి’ కాస్తా.. ‘ఐ లవ్ ఏపీ’గా మారింది
Read Also: రైలు ఢీకొట్టే ముందు.. బిడ్డను విసిరి కాపాడి..