మంత్రులకు జగన్ కీలక ఆదేశాలు.. ఇక నుంచి తప్పనిసరిగా..

సీఎం జగన్ మంత్రుల విషయంలో కీలక నిర్ణయం తీసుకున్నారు. ఇక నుంచి ప్రతి బుధవారం మంత్రులు విధిగా సచివాలయంలో అందుబాటులో ఉండాలని సర్కారు ఆదేశాలు జారీ చేసింది. ప్రజలు తమ సమస్యలను చెప్పుకోవడానికి, అర్జీలు అందించడానికి వీలుగా మంత్రులంతా ప్రతి బుధవారం సచివాలయానికి హాజరు కావాలని ప్రభుత్వం ఆదేశాలు జారీ చేసింది. సంక్షేమ పథకాలతోపాటు, ప్రజా సమస్యలు తీర్చడానికి జగన్ సర్కారు అధిక ప్రాధాన్యం ఇస్తోంది. అందులో భాగంగానే గ్రామ, వార్డు స్థాయిల్లో వాలంటీర్ల ద్వారా సమస్యలను స్థానికంగానే పరిష్కరించే ప్రయత్నం చేస్తున్నారు. స్పందన కార్యక్రమం ద్వారానూ సమస్యలను పరిష్కరిస్తున్నారు.

ఇప్పుడు మంత్రులు కూడా సచివాలయంలో కచ్చితంగా అందుబాటులో ఉండటం ద్వారా సంబంధిత శాఖల సమస్యలు సత్వరం పరిష్కారమయ్యే అవకాశం ఉందని జగన్ భావిస్తున్నారు. తన పాలన పట్ల ప్రజల్లో సానుకూలత పెరగడం కోసం ఆయన ఏ విషయంలోనూ రాజీ పడటం లేదు.

గతంలో జరిగిన కేబినెట్ భేటీలో.. మంత్రులు ప్రతి మంగళవారం, బుధవారం విధిగా సచివాలయానికి రావాలని సీఎం ఆదేశించారు. కానీ దూరభారం, సంక్షేమ పథకాల అమలు, నియోజకవర్గాల్లో పనుల దృష్ట్యా మంత్రులకు వెసులుబాటు కల్పిస్తూ.. వారంలో ఒక్క రోజు ఉంటే సరిపోతుందని తాజా ఉత్తర్వుల్లో పేర్కొన్నారు.