నేడు వైఎస్సార్ చేయూత.. ఒక్కొ అకౌంట్‌లో రూ.18,750 జమ

ఏపీలో ప్రభుత్వ పథకాలకు అర్హత ఉన్న అందని వారికి తిరిగి అందిస్తోంది జగన్ సర్కార్. మరోసారి అర్హతలను పరిశీలించి గ్రీన్ సిగ్నల్ ఇస్తోంది. రాష్ట్రంలో లబ్ధిదారులను ప్రభుత్వం మరోమారు ఎంపిక చేసింది.. వారికి డబ్బును అకౌంట్‌లో జమ చేస్తోంది. అర్హత ఉన్న ఏ ఒక్కరూ కూడా లబ్ధి పొందకుండా మిగిలిపోకూడదనే వైఎస్సార్‌ చేయూత కింద మిగిలిపోయిన అర్హులైన వారికి గురువారం ఆర్థిక సాయం అందించనున్నారు. రెండో ఫేజ్‌ కింద 45 నుంచి 60 ఏళ్లలోపు 2,72,005 మంది మహిళలకు రూ.18,750 చొప్పున రూ.510.01 కోట్ల ఆర్థిక సాయాన్ని రాష్ట్ర ప్రభుత్వం జమ చేయనుంది.

ఈ పథకం కింద ఏటా రూ.18,750 చొప్పున నాలుగేళ్లలో రూ.75 వేలు అందజేస్తారు. ఆగస్టు 12న వైఎస్సార్‌ చేయూత కింద 21,00,189 మంది బీసీ, ఎస్సీ, ఎస్టీ, మైనార్టీ మహిళల ఖాతాలకు ముఖ్యమంత్రి వైఎస్‌ జగన్‌ నగదు బదిలీ చేశారు. ఆ సమయంలో ఎవరైనా మిగిలిపోయి ఉంటే పేర్లు నమోదు చేసుకునేందుకు నెల గడువు ఇస్తున్నామని.. అర్హులందరికీ ఆర్థిక సాయం అందిస్తామన్నారు. దరఖాస్తు చేసుకున్న అర్హులైన 2,72,005 మంది మహిళల ఖాతాలకు నేడు రూ.510.01 కోట్లను రాష్ట్ర ప్రభుత్వం బదిలీ చేయనుంది.