ప్రజలు ఆగ్రహంతో ఉన్నారు.. జాగ్రత్త.! ఏపీ పోలీసులతో హోం మంత్రి

హైదరాబాద్‌లో వెటర్నరీ డాక్టర్ హత్యోదంతంతో ఏపీ పోలీసులు అలర్ట్ అయ్యారు. బాధితులు ఎవరైనా ఫిర్యాదు చేసేందుకు వస్తే పోలీస్ స్టేషన్ పరిధి అంటూ కుంటిసాకులు చెప్పకుండా జీరో ఎఫ్‌ఐఆర్ నమోదు చేయాలని ఇప్పటికే ఏపీ పోలీస్ బాస్ గౌతం సవాంగ్ ఆదేశాలు జారీ చేసిన విషయం తెలిసిందే. ఇదే విషయమై ఏపీ హోంమంత్రి మేకతోటి సుచరిత ఈ రోజు పోలీసులకు కీలక సూచనలు చేశారు.

గుంటూరు మహిళా పోలీస్ స్టేషన్‌ను సందర్శించిన హోం మినిస్టర్ సుచరిత స్టేషన్ రికార్డులను తనిఖీ చేశారు. మహిళల ఫిర్యాదులు.. పోలీసులు తీసుకున్న చర్యలు.. పెండింగ్ కేసులపై ఆరా తీశారు. అనంతరం ఆమె మాట్లాడుతూ పోలీస్ స్టేషన్ పరిధి చూడకుండా బాధితుల ఫిర్యాదులను పరిష్కరించాలని.. జీరో ఎఫ్‌ఐఆర్ నమోదు చేయాలని పోలీసులను ఆదేశించారు.

Also Read: మాది సిన్సియర్ లవ్.. అందుకే చనిపోతున్నా.. టిక్‌టాక్‌లో వీడియో కలకలం

జస్టిస్ ఫర్ దిశ ఘటనపై హోం మంత్రి స్పందించారు. నిర్భయ, దిశ ఘటనలతో ప్రజలు ఆగ్రహంగా ఉన్నారని.. పోలీసులు మరింత అప్రమత్తంగా వ్యవహరించాలని సూచించారు. బాధితులు ఫిర్యాదుల పట్ల సత్వరం స్పందించాలని.. పోలీస్ స్టేషన్ల చుట్టూ తిప్పకుండా చర్యలు చేపట్టాలని ఆదేశాలిచ్చారు. త్వరలోనే అన్ని పోలీస్ స్టేషన్ల వద్ద ఫిర్యాదుల పెట్టెలు ఏర్పాటు చేయనున్నట్లు వెల్లడించారు.

మహిళల భద్రతపై దేశవ్యాప్తంగా చర్చ జరుగుతోందని హోం మంత్రి సుచరిత అన్నారు. ఎలాంటి పరిస్థితుల్లోనూ ఫిర్యాదుదారులతో అమర్యాదగా ప్రవర్తించవద్దని ఆమె హెచ్చరించారు. ఫిర్యాదు చేసేందుకు వచ్చిన బాధితులతో దురుసుగా వ్యవహరించకూడదని.. ఫ్రెండ్లీ పోలీసింగ్ అవసరమన్నారు. త్వరలో మహిళా పోలీసు స్టేషన్‌లో మహిళా అధికారులను నియమిస్తామని హోంమంత్రి తెలియజేశారు.

Read Also: ఇద్దరిని కత్తితో పొడిచిన ఇసుక ట్రాక్టర్ డ్రైవర్.. ఒంగోలులో దారుణం