'జనసేన లాంగ్ మార్చ్‌కు టీడీపీ జనసమీకరణ'

రాష్ట్రంలో ఇసుక కొరత ఉన్న మాట వాస్తవమే అంటున్నారు మంత్రి కురసాల కన్నబాబు. వరదల వల్లే కొరత ఏర్పడుతుందని.. కానీ వాస్తవాలు తెలుసుకోకుండా టీడీపీ, జనసేన పార్టీ నేతలు మాట్లాడటం సరికాదన్నారు. డిమాండ్‌కు, సరఫరా మధ్య తేడా వచ్చిందని.. అందుకే కాస్త ఇబ్బందులు తలెత్తాయన్నారు. వరద సమయంలో ఇసుక తీస్తే ప్రమాదాలకు బాధ్యులెవరో చెప్పాలన్నారు. రాష్ట్ర వ్యాప్తంగా 267 ర్యాంపుల్లో అనుమతులిచ్చినా ఇసుక తవ్వలేని పరిస్థితి ఏర్పడిందని.. కొరతను పరిష్కరించేందుకు ప్రభుత్వం ప్రయత్నిస్తోందన్నారు.

Read Also: సీఎం జగన్ టంగ్ స్లిప్.. టీడీపీ ఎమ్మెల్సీ ట్రోల్స్

నదుల్లో వరద ఉంటే ఇసుక ఎలా తీస్తారో ప్రతిపక్షాలు చెప్పాలన్నారు మంత్రి. ప్రతిపక్షాలు ఇసుక కొరతపై అనవసరంగా రాద్దాంతం చేస్తున్నారన్నారని.. రాజకీయ కోసం దీక్షల పేరుతో ప్రజలను మోసం చేస్తున్నారని మండిపడ్డారు. చంద్రబాబు, లోకేష్, పవన్‌ కళ్యాణ్‌కు ఇవేమీ పట్టడం లేదని.. ఇసుకతో రాజకీయం చేయాలని చూస్తున్నారని మండిపడ్డారు. గుంటూరులో సొంత పుత్రుడు లోకేష్ దీక్ష చేస్తే.. వైజాగ్‌లో దత్తపుత్రుడు పవన్‌ మార్చ్ చేస్తున్నారని సెటైర్లు పేల్చారు. చంద్రబాబు హయాంలో ఇసుక మాఫియా అరాచకాలపై ఎందుకు నోరు మెదపలేదని ప్రశ్నించారు.

టీడీపీ సర్కార్ హయాంలో నేషనల్ గ్రీన్ ట్రిబ్యునల్ ప్రభుత్వానికి రూ. 100 కోట్లు జరిమానా విధించిందని గుర్తు చేశారు. ఇసుక అక్రమ రవాణాను అడ్డుకున్న మహిళలపై చంద్రబాబు లాఠీచార్జీ చేయించారన్నారు. జనసేన లాంగ్ మార్చ్‌‌కు బీజేపీ మద్దతు లేదని.. సొంతంగా పోరాటం చేస్తామని ప్రకటించిందని మంత్రి గుర్తు చేశారు. లెఫ్ట్ పార్టీలు కూడా పవన్‌తో వేదిక పంచుకోమని చెప్పేసిందన్నారు. ఇప్పటికైనా కలిసి పోటీ చేసిన వామపక్షాలు ఎందుకు తన నుంచి దూరమయ్యాయో పవన్ ఆత్మపరిశీలన చేసుకోవాలని సూచించారు. పవన్ మార్చ్ కోసం టీడీపీ నేతలు జన సమీకరణ చేస్తున్నారనే వార్తలు వినిపిస్తున్నాయన్నారు.