Kodela: దొంగతనం ఎవరు చేయమన్నారు? ఎవరు చనిపోమన్నారు?: మంత్రి పిల్లి

కోడెల మరణం రాజకీయ రంగు పులుముకుంటోంది. మాజీ స్పీకర్ ఆత్మహత్య చేసుకోవడానికి వైఎస్ఆర్సీపీ వేధింపులే కారణమని టీడీపీ నేతలు ఆరోపిస్తున్నారు. మంత్రి పిల్లి సుభాష్ చంద్రబోస్ మాట్లాడుతూ.. ప్రజల ఆస్తిని దొంగిలించినందుకు.. జనాలకు ముఖం చూపలేకే ఆయన చనిపోయి ఉంటారన్నారు. దొంగతనం ఎవరు చేయమన్నారు? ఎవరు చనిపోమన్నారు? దురదృష్టం అని పిల్లి సుభాష్ చంద్రబోస్ వ్యాఖ్యానించారు. ఆయన మరణానికి రాజకీయ వేధింపులు కారణం కాదన్నారు.

కోడెల మరణం పట్ల మంత్రి బొత్స సత్యనారాయణ స్పందించారు. కోడెల కుటుంబ సభ్యులకు ఆయన ప్రగాఢ సానుభూతిని తెలియజేశారు. మాజీ స్పీకర్ అయిన కోడెల మరణం గురించి సమగ్రంగా విచారణ జరపాలని తెలంగాణ ప్రభుత్వాన్ని ఆయన కోరారు. కోడెల మరణం గురించి రకరకాల వార్తలొచ్చాయన్న బొత్స.. ముందుగా ఓ న్యూస్ ఛానల్‌లో గుండెపోటు కారణమని ప్రసారం చేశారన్నారు. తర్వాత అదే ఛానల్‌లో ప్రమాదకర ఇంజెక్షన్లు వేసుకున్నారని మరో వార్త వచ్చింది.

కొడెల ఒత్తిడితో ఆత్మహత్య చేసుకున్నారని కొన్ని మీడియా సంస్థలు ప్రసారం చేశాయి. సీనియర్ రాజకీయ నాయకుడైన కోడెల మరణంపై రకరకాలుగా ప్రచారం జరుగుతోంది. కాబట్టి కొడెల మరణంపై సమగ్ర విచారణ జరపాలని బొత్స తెలంగాణ ప్రభుత్వాన్ని కోరారు. సాక్ష్యాలు తారుమారు కాకుండా చూడాలన్నారు. నిమ్స్, కేర్ లాంటి ఎన్నో హాస్పిటల్స్ ఉండగా.. కోడెలను బసవతారకం కేన్సర్ హాస్పిటల్‌కు ఎందుకు తీసుకెళ్లారు..? అని ప్రశ్నించారు.

కోడెల మరణం వెనుక కారణాలేంటి? కుటుంబ కలహాలా, ఇతరత్రా కారణాలు ఉన్నాయా? అనేది తేలాల్సి ఉందన్నారు బొత్స. పల్నాడు ప్రాంత ప్రజానీకం ఫిర్యాదులపైనే ఆయనపై కేసులు పెట్టారు. ఆయన్ను పోలీసులు అరెస్ట్ చేయలేదు, ఇబ్బంది పెట్టలేదని తెలిపారు. బాధితులు కోడెల మీద ఫిర్యాదు చేశారు కానీ... ప్రభుత్వం ఉద్దేశపూర్వకంగా కేసులు పెట్టలేదని మంత్రి స్పష్టం చేశారు.