మార్చి 10 ఏపీలో సెలవు దినం.. ఈ ప్రాంతాల్లో మాత్రమే!

ఏపీలో ఇప్పుడు ఎన్నికల సీజన్ నడుస్తోంది. నాలుగు విడతల్లో జరిగిన పంచాయతీ ఎన్నికలు ముగియగా.. మరి కొద్ది రోజుల్లోనే మున్సిపల్ ఎన్నికలు, ఎంపీటీసీ, జెడ్పీటీసీ ఎన్నికలు జరగనున్నాయి. ఎమ్మెల్యే కోటా ఎమ్మెల్సీ ఎన్నికలు సైతం జరగనున్నాయి. కాగా మున్సిపల్‌ ఎన్నికల దృష్ట్యా మార్చి 10ని సెలవు దినంగా ప్రకటించాలని ఏపీ ఎస్‌ఈసీ నిమ్మగడ్డ రమేశ్‌ కుమార్‌ జిల్లాల కలెక్టర్లను ఆదేశించారు.

ఎన్నికలు జరగనున్న 12 కార్పొరేషన్లు, 75 మున్సిపాలిటీల్లో మార్చి 10న సెలవు ప్రకటించాలని కలెక్టర్లకు ఎస్‌ఈసీ సూచించారు. ఎన్నికల ఏర్పాట్లపై కలెక్టర్లతో సోమవారం నిర్వహించిన సమీక్ష సమావేశం సందర్భంగా నిమ్మగడ్డ ఈ ఆదేశాలు జారీ చేశారు.

పోలింగ్‌, కౌంటింగ్‌ రోజుల్లో ప్రభుత్వ ఆఫీసులకు సెలవు ఇవ్వాలని ఎస్ఈసీ సూచించారు. ఎన్నికలు జరిగే మార్చి 10, కౌంటింగ్ జరిగే మార్చి 14న ప్రభుత్వ పాఠశాలలను వాడుకోవాలన్నారు. ఎన్నికలకు కట్టుదిట్టంగా ఏర్పాట్లు చేయాలని.. సమస్మాత్మక పోలింగ్‌ కేంద్రాలపై దృష్టి సారించాలని పోలీసు శాఖను ఆదేశించారు.