AP NGO: రేపు విద్రోహ దినం.. కలెక్టరేట్ల వద్ద నల్ల బ్యాడ్జీలతో నిరసన

ఏపీఎన్జీవో తన పోరాటాన్ని ఉధృతం చేసింది. సెప్టెంబర్ 1న విద్రోహ దినంగా పాటిస్తామని ప్రకటించింది. ఉద్యోగుల అక్రమ నిర్బంధాలకు నిరసనగా ఈ కార్యక్రమం చేపట్టినట్లు ఉద్యోగ సంఘాల నేతలు తెలిపారు. రేపు కలెక్టరేట్‌ వద్ద నల్ల బ్యాడ్జీలతో నిరసన తెలుపుతామని చెప్పారు. ముఖ్యమంత్రి ఇంటి ముట్టడి కార్యక్రమాన్ని విరమించినా.. అరెస్టు చేయటం అన్యాయమని మండిపడ్డారు. సీపీఎస్‌ రద్దు కోసం పోరాడుతున్న ఉద్యోగులపై రాష్ట్ర ప్రభుత్వం వేధింపులు, బెదిరింపులు, బైండోవర్‌ చేయడం తగదని హితవు పలికారు. ఉద్యోగులపై ప్రభుత్వం పెట్టిన కేసులు తక్షణమే ఉపసంహరించుకోవాలని డిమాండ్‌ చేశారు.

సీపీఎస్‌ రద్దు చేసేంత వరకు పోరాటం ఆగదని ఏపీ ఎన్జీవో సంఘం స్పష్టం చేసింది. సీఎం వైఎస్ జగన్ తాను ఇచ్చిన హామీ నెరవేర్చకపోతే ఉద్యమం తప్పదని సంఘం నేతలు హెచ్చరించారు. మరోవైపు.. సీపీఎస్‌ను రద్దు చేయాలంటూ ఉద్యోగులు తలపెట్టిన ‘చలో విజయవాడ’ కార్యక్రమాన్ని సెప్టెంబర్‌ 11కి వాయిదా వేశారు.