సభలు, సమావేశాలపై ఎలాంటి నిషేధం లేదు.. జీవో నంబర్ 1పై ఏపీ పోలీసుల క్లారిటీ

జగన్ సర్కారు తీసుకొచ్చిన జీవో నంబర్‌ 1పై జరగుతున్న ప్రచారంపై ఆంధ్రప్రదేశ్‌ అడిషనల్‌ డీజీపీ రవిశంకర్‌ అయ్యన్నార్‌‌ వివరణ ఇచ్చారు. ఈ మేరకు మంగళగిరిలోని డీజీపీ కార్యాలయంలో మంగళవారం రవిశంకర్ మాట్లాడుతూ.. 1861 పోలీస్‌ చట్టానికి లోబడే జీవో నంబర్‌ 1 విడుదల చేసినట్లు పేర్కొన్నారు. అయితే, షరతులకు లోబడి సభలు, సమావేశాలు నిర్వహించుకునేంకు అనుమతి ఇస్తామన్నారు. రాష్ట్రంలో సభలు, సమావేశాలపై ఎలాంటి నిషేధం లేదని స్పష్టం చేశారు. రాష్ట్రంలో సభలు, సమావేశాలు నిషేధం అంటూ జరుగుతున్న ప్రచారంలో వాస్తవం లేదన్నారు.

ఇటీవల జరిగిన సంఘటనలను దృష్టిలో పెట్టుకొని ఈ జీవో తీసుకొచ్చినట్లు ఏడీజీపీ రవి శంకర్‌ వెల్లడించారు. ప్రజలకు అసౌకర్యం కలగకుండా సభలు నిర్వహించుకోవాలని సూచించారు. పోలీసులు వేదిక స్థలాన్ని పరిశీలించి అనుమతి ఇస్తారని తెలిపారు. అయితే రహదారులు, రోడ్లపై సభలకు అనుమతి లేదన్నారు. అది కూడా అత్యవసరమైతే అనుమతులతో నిర్వహించుకోవచ్చని వెల్లడించారు.

ఈ జీవో ఉద్దేశం ఎవరిపైనా నిషేధం కాదని రవి శంకర్ స్పష్టం చేశారు. ప్రజల రక్షణ, ట్రాఫిక్‌కు ఇబ్బంది లేకుండా, అత్యవసర సేవలకు అంతరాయం కలగకుండా ఉండటం వంటి అంశాలను పరిగణలోకి తీసుకొని జీవో నంబర్‌ 1ను తీసుకొచ్చినట్లు పేర్కొన్నారు. ప్రస్తుత చట్టం దేశవ్యాప్తంగా అమలవుతున్నదేనని వివరించారు.

అత్యవసర పరిస్థితుల్లో అనుమతులు..అలాగే, ప్రజలకు అసౌకర్యం కలిగించేలా రహదారులపై సభలు వద్దన్నట్లు లా అండ్‌ ఆర్డర్‌ డీఐజీ రాజశేఖర్‌ తెలిపారు. మరీ అత్యవసర పరిస్థితుల్లో అనుమతులు తీసుకోవచ్చని పేర్కొన్నారు. సన్నగా, ఇరుగ్గా ఉండే రోడ్లపై సభల వల్ల సాధారణ ప్రజలకు ఇబ్బంది ఏర్పుడుతుందని.. అంబులెన్సులు, విమాన ప్రయాణాల వారికి సమస్యలు తీసుకురావద్దని సూచించారు. అందువల్లే పబ్లిక్ గ్రౌండ్లలో సభలు జరుపుకోవాలని జీవోలో ఉందని వివరించారు.