ఏపీలో 4 రోజులు భారీ వర్షాలు.. ఈ 3 జిల్లాల ప్రజలకు తీవ్ర హెచ్చరికలు

బంగాళాఖాతంలో ఏర్పడిన అల్పపీడనం ప్రభావంతో ఆంధ్రప్రదేశ్‌లో 4 రోజుల పాటు వర్షాలు పడుతాయని రాష్ట్ర విపత్తు నిర్వహణ శాఖ వెల్లడించింది. కాబట్టి లోతట్టు ప్రాంత ప్రజలు అప్రమత్తంగా ఉండాలని, తీరం వెంబడి గంటకు 45 నుంచి 55 కిలో మీటర్ల వేగంతో ఈదురు గాలులు వీస్తాయని పేర్కొంది. ఈ మేరకు రాష్ట్ర విపత్తుల నిర్వహణ శాఖ కమిషనర్ కె.కన్నబాబు బుధవారం మాట్లాడుతూ.. అల్పపీడన ప్రభావంతో సముద్రంలోని అలలు 3 నుంచి 3.5 మీటర్ల ఎత్తు ఎగిసిపడే అవకాశం ఉన్నట్లు పేర్కొన్నారు.

కాబట్టి నాలుగు రోజుల పాటు మత్స్యకారులు వేటకు వెళ్లొద్దని కమిషనర్ కన్నబాబు హెచ్చరికలు జారీ చేశారు. వాయువ్య బంగాళాఖాతం, పరిసర ప్రాంతంలో గురువారం అల్పపీడనం ఏర్పడనుందని తెలిపారు. దీని ప్రభావంతో రాబోయే 4 రోజుల పాటు రాష్ట్రంలో భారీ వర్షాలు కురిసే అవకాశం ఉందన్నారు. ఈ నాలుగు రోజులు తీరం ప్రాంతం అలజడిగా ఉంటుందని మత్స్యకారులు సముద్రంలోకి వేటకు వెళ్లరాదని హెచ్చరించారు.

వచ్చే 4 రోజుల వాతావరణ వివరాలు..
ఆగస్టు 13వ తేదీ: విశాఖపట్నం, తూర్పు గోదావరి జిల్లాలో అక్కడక్కడ భారీ వర్షాలు పడే అవకాశం ఉంది. రాష్ట్రంలో మిగిలిన చోట్ల అక్కడక్కడ తేలికపాటి నుంచి మోస్తారు వర్షాలు పడే సూచన.

ఆగస్టు 14వ తేదీ: విశాఖపట్నం, తూర్పు గోదావరి, పశ్చిమగోదావరి జిల్లాలో అక్కడక్కడ మోస్తారు నుంచి భారీ వర్షాలు పడే అవకాశం ఉంది. రాష్ట్రంలో మిగిలిన చోట్ల అక్కడక్కడ తేలికపాటి నుంచి మోస్తారు వర్షాలు పడే అవకాశం.

ఆగస్టు 15వ తేదీ: విశాఖపట్నం, తూర్పు గోదావరి జిల్లాల్లో అక్కడక్కడా మోస్తారు నుంచి భారీ వర్షాలు పడే అవకాశం ఉంది. రాష్ట్రంలో మిగిలిన చోట్ల అక్కడక్కడా తేలికపాటి నుంచి మోస్తారు వర్షాలు పడే సూచన.

ఆగస్టు 16వ తేదీ: విశాఖపట్నం, తూర్పుగోదావరి జిల్లాల్లో అక్కడక్కడా మోస్తారు నుంచి భారీ వర్షాలు పడే అవకాశం ఉంది. రాష్ట్రంలో మిగిలిన చోట్ల అక్కడక్కడ తేలికపాటి నుంచి మోస్తారు వర్షాలు పడే అవకాశం.