Kakinada: భవంతి పైనుంచి దూకి.. భవన నిర్మాణ కార్మికుడి బలవన్మరణం

ఇసుక కొరతపై ప్రభుత్వాన్ని నిలదీస్తూ ప్రతిపక్షాలు పోరాటానికి దిగిన వేళ.. ఏపీలో మరో విషాదం చోటు చేసుకుంది. ఇసుక కొరతతో నిర్మాణాలు ఆగిపోయి, పని లేకపోవడంతో మరో భవన నిర్మాణ కార్మికుడు బలవన్మరణానికి పాల్పడ్డాడు. తూర్పుగోదావరి జిల్లా కాకినాడలో కొయ్య వీరబాబు అనే భవన నిర్మాణ కార్మికుడు బిల్డింగ్ మీది నుంచి దూకి ఆత్మహత్య చేసుకున్నాడు. పనులు లేకపోవడంతో.. ఆదాయం లేక.. కుటుంబ పోషణ భారమైందని, అందుకే వీరబాబు మనస్తాపం చెందినట్లు కుటుంబసభ్యులు చెబుతున్నారు.

చేసేందుకు పనులు లేక, ఆదాయం వచ్చే మార్గం లేకపోవడంతో.. ఇటీవలే గుంటూరు జిల్లాలో ఇద్దరు భవన నిర్మాణ కార్మికులు ఆత్మహత్య చేసుకున్నారు. గుర్రం నాగరాజు (35) తాడేపల్లి మండలం ఉండవల్లిలో ఉరేసుకోగా.. పొన్నూరులో అడపా రవి అనే మరో కార్మికుడు పురుగులమందు తాగి ప్రాణాలు తీసుకున్నాడు.

చంద్రబాబు సంతాపం..
భవన నిర్మాణ కార్మికుడు కొయ్య వీరబాబు ఆత్మహత్య చేసుకోవడం పట్ల చంద్రబాబు సానుభూతి వ్యక్తం చేశారు. ఇసుక కొరతతో వీరబాబు ఆత్మహత్య చేసుకోవటం బాధాకరమన్న ఆయన.. భవన నిర్మాణ కార్మికుడి మృతి తీవ్రంగా కలిచివేసిందన్నారు. వారి కుటుంబ సభ్యులకు ప్రగాడ సానుభూతి తెలియజేశారు. మృతిచెందిన వీరబాబు కుటుంబానికి నష్టపరిహారం చెల్లించి ప్రభుత్వం ఆదుకోవాలని చంద్రబాబు నాయుడు డిమాండ్‌ చేశారు.

‘‘ఇసుక కొరత వల్ల ఉపాధి లేక ఆకలిమంటలతో రోజుకొక కార్మికుడు ఆత్మహత్యకు పాల్పడుతున్నాడు. కార్మికుల ప్రాణాలంటే ప్రభుత్వానికి లెక్కలేదా? ఇంత మంది చనిపోతున్నా ప్రభుత్వానికి కనువిప్పు కలగదా? మీ నిర్లక్ష్యానికి ఇంకెంతమంది కార్మికులు బలికావాలి? టీడీపీ 5 ఏళ్ల పాలనలో ఏనాడు కార్మికులు రోడ్డెక్కలేదు. కానీ వైసీపీ 5 నెలల పాలనలోనే అనేక మంది కార్మికులు ఆత్మహత్యలు చేసుకునే పరిస్థితి కల్పించారు. ప్రభుత్వం ఇకనైనా గత టీడీపీ హయాంలో అమలు చేసిన ఉచిత ఇసుక విధానాన్ని అమలు చేసి సమస్యకు పరిష్కారం చూపాల’’ని చంద్రబాబు సూచించారు.