రైతు సమస్యలపై సభ పెట్టడమే నేరమా? బీసీలపై సీఎం జగన్ అణిచివేత: అచ్చెన్న

వెనకబడిన వర్గాల (బీసీ)పై ముఖ్యమంత్రి వైఎస్ జగన్మోహన్ రెడ్డి మొసలి కన్నీరు కారుస్తున్నారని తెలుగు దేశం పార్టీ రాష్ట్ర అధ్యక్షుడు కింజరాపు అచ్చెన్నాయుడు మండిపడ్డారు. చిత్తూరు జిల్లా పుంగనూరులో బీసీ వర్గానికి చెందిన జనసేన నాయకుడు రామచంద్రయాదవ్ ఇంటిపై దాడి చేయడం దుర్మార్గమన్నారు. టీడీపీ జాతీయ ప్రధాన కార్యదర్శి నల్లారి కిశోర్ కుమార్ రెడ్డితో కలిసి సోమవారం అచ్చెన్నాయుడు మీడియాతో మాట్లాడారు.

ఈ సందర్భంగా అచ్చెన్నాయుడు మాట్లాడుతూ.. ప్రజా సమస్యలపై గళమెత్తితే దాడులు చేస్తారా అని మండిపడ్డారు. సీఎం జగన్మోహన్ రెడ్డి వ్యవహార శైలి బీసీలను అణచివేసేలా ఉందన్నారు. రైతు సమస్యలపై సభ పెట్టడమే నేరమన్నట్లుగా రామచంద్రయాదవ్‌పై దాడి చేశారని మండిపడ్డారు. మంత్రి పెద్దిరెడ్డి రామచంద్రారెడ్డి అరాచకానికి, సీఎం జగన్‌ దుర్మార్గానికి ఈ దాడి నిదర్శమని దుయ్యబట్టారు.

బీసీలను అణగదొక్కుతూ..‘జయహో బీసీ’ అంటూ సభ పెట్టే అర్హత జగన్ రెడ్డికి ఉందా అని అచ్చెన్నాయుడు మండిపడ్డారు. 2024లో జగన్ రెడ్డికి బీసీలు సమాధానం చెబుతారన్నారు. పోలీసులను అడ్డం పెట్టుకొని ఓ బీసీ నాయకుడి ఇంటిని ధ్వంసం చేశారని.. రైతు సమస్యలపై సదస్సు నిర్వహించడమే తప్పా అని నిలదీశారు. ప్రశ్నిస్తే దాడి చేయడమే వైసీపీ నేతలకు తెలిసిన రాజకీయమా అని ప్రశ్నించారు. ఓ వైపు బీసీ నేతలపై దాడి చేసి మళ్లీ బీసీ సభ అంటూ డ్రామాలాడటం సిగ్గుచేటని విమర్శించారు.