ఏపీ ప్రజలకు అలర్ట్: 3 రోజులు భారీ వర్షాలు.. ఆ ప్రాంత ప్రజలకు తీవ్ర హెచ్చరికలు!

బంగాళాఖాతంలో మరో అల్పపీడనం ఏర్పడింది. దీని ప్రభావం వల్ల మరో మూడు రోజులు భారీ వర్షాలు కురిసే అవకాశం ఉందని ఐఎండీ వెల్లడించారు. తూర్పు మధ్య, ఈశాన్య బంగాళాఖాతం పరిసర ప్రాంతాల్లో అల్పపీడనం ఏర్పడిందని, అది వాయువ్య దిశగా పయనించి 48 గంటల్లో ఉత్తర ఒడిశా – పశ్చిమబెంగాల్ తీరం వెంబడి వాయుగుండంగా మారే అవకాశం ఉందని విపత్తుల శాఖ కమిషనర్ కె. కన్నబాబు వెల్లడించారు. దీని ప్రభావంతో రాబోయే 2 రోజుల పాటు ఉత్తరాంధ్రలో అక్కడక్కడ భారీ వర్షాలు, మిగిలిన చోట్ల మోస్తరు నుంచి తేలికపాటి జల్లులు పడే అవకాశం ఉందని పేర్కొన్నారు.

బంగాళాఖాతంలో అల్పపీడనం ఫలితంగా పశ్చిమ బెంగాల్, ఒడిశా రాష్ట్రాల తీరం వెంబడి గంటకు 55 నుంచి 65 కిలో మీటర్ల వేగంతో తీవ్ర గాలులు వీస్తాయని కన్నబాబు తెలిపారు. దీని వల్ల సముద్రంలోకి వేటకు వెళ్లే మత్స్యకారులు ఆదివారం నుంచి మంగళవారం వరకు వేటకు వెళ్ళరాదని కన్నబాబు జాలర్లను హెచ్చరికలు జారీ చేశారు.

ఇక, రాబోయే 24 గంటల్లో శ్రీకాకుళం, విజయనగరం, విశాఖ, ఉభయ గోదావరి జిల్లాల్లో, అక్కడక్కడా మోస్తరు నుంచి భారీ వర్షాలు కురుస్తాయి. మిగిలిన జిల్లాల్లో అక్కడక్కడ తేలికపాటి జల్లులు పడే అవకాశం ఉందని అమరావతిలోని వాతావరణ కేంద్రం స్పష్టం చేసింది. ఈ నెల 12, 13 తేదీల్లో ఉత్తర కోస్తా, ఉభయ గోదావరి జిల్లాల్లో మోస్తరు నుంచి విస్తారంగా వర్షాలు కురుస్తాయని కన్నబాబు వివరించారు.