ఈనెల 29 నుంచి 1,081 ప్రత్యేక బస్సులు.. వివరాలివే!

దసరా పండుగకు సొంతూళ్లకు వెళ్లేవారికి ఆంధ్రప్రదేశ్ రాష్ట్ర రోడ్డు రవాణా సంస్థ (ఏపీఎస్‌ ఆర్టీసీ) గుడ్ న్యూస్ చెప్పింది. దసరా రద్దీని దృష్టిలో ఉంచుకుని ప్రత్యేక బస్సులు ఏర్పాటు చేస్తున్నట్లు ప్రకటించింది. ఈ నెల 29 నుంచి అక్టోబర్ 10వ తేదీ వరకు ఈ స్పెషల్ బస్సులు నడపనున్నట్లు వెల్లడించింది.

ఈ మేరకు విజయవాడ నుంచి రాష్ట్రం నలుమూలలకు 1,081 అదనపు బస్సులు నడుస్తాయని ఏపీఎస్ ఆర్టీసీ ప్రకటించింది. విజయవాడ నుంచి విశాఖపట్నం, రాజమహేంద్రవరం, కాకినాడ, తిరుపతి, రాయలసీమ జిల్లాలకు, అమలాపురం, భద్రాచలానికి, హైదరాబాద్‌, బెంగళూరు, చెన్నై ప్రాంతాలకు ప్రత్యేక బస్సులు నడుస్తాయని వెల్లడించింది.

అలాగే, ప్రయాణికులకు ఊరట కలిగించే విషయం చెప్పింది. సాధారణంగా ప్రత్యేక బస్సుల్లో అధనపు ఛార్జీలు వసూలు చేస్తారు. కానీ, ఈసారి ప్రత్యేక బస్సుల్లోనూ సాధారణ ఛార్జీలే వసూలు చేస్తున్నట్లు వెల్లడించింది. ఈ ప్రత్యేక బస్సుల్లో టికెట్‌ రిజర్వేషన్‌ సదుపాయం కూడా ఉంటుందని వివరించింది. ఏపీఎస్‌ ఆర్టీసీ వెబ్‌సైట్‌లో ప్రత్యేక బస్సుల వివరాలను పొందుపరిచినట్లు ఆర్టీసీ అధికారులు తెలిపారు.