కేంద్రాన్ని సీఎం జగన్ ఫాలో కావాలి.. పెట్రోల్, డీజిల్ ధరలపై జీవీఎల్ కామెంట్స్

ఆంధ్రప్రదేశ్‌ రాష్ట్రంలో వెంటనే పెట్రోలు, డీజిల్ ధరలు తగ్గించాలని భారతీయ జనతా పార్టీ (బీజేపీ) రాజ్యసభ సభ్యుడు జీవీఎల్ నరసింహారావు డిమాండ్ చేశారు. అలాగే పెట్రోలు, డీజిల్ ధరలు తగ్గించినందుకు ప్రధాని నరేంద్ర మోదీకి కృతజ్ఞతలు తెలిపారు. ఆరు నెలల్లో రెండు సార్లు భారీగా తగ్గించి ప్రజలకు ఉపశమనం కలిగించారని కొనియాడారు. ప్రజలకు ఉపశమనం కలిగించేందుకు ముఖ్యమంత్రి వైఎస్ జగన్మోహన్ రెడ్డి కేంద్రం మాదిరిగానే భారీగా వ్యాట్‌ తగ్గించాలని డిమాండ్ చేశారు. ఈ మేరకు జీవీఎల్ నరసింహారావు ట్వీట్ చేశారు.


‘‘పెట్రోల్‌పై సెంట్రల్ ఎక్సైజ్‌ని ₹8/లీటర్ & డీజిల్ ₹6/లీటర్ తగ్గించినందుకు ప్రధాని నరేంద్ర మోదీజీకి కృతజ్ఞతలు. దీని కారణంగా రిటైల్ ధరలు ₹9.5 /లీటర్ పెట్రోల్ & ₹7/లీటర్ డీజిల్ తగ్గుతాయి. ఆరు నెలల్లో రెండు సార్లు భారీగా తగ్గించి ప్రజలకు ఉపశమనం కలిగించి నందుకు మోడీ గారికి ధన్యవాదాలు

వైసీపీ ప్రభుత్వం వ్యాట్‌ని విపరీతంగా పెంచడంతో ఆంధ్రప్రదేశ్‌లో పెట్రోలు, డీజిల్ ధరలు దేశంలోనే అత్యధికంగా ఉన్నాయి. ప్రజలకు ఉపశమనం కలిగించడానికి ఏపీ ముఖ్యమంత్రి వైఎస్ జగన్మోహన్ రెడ్డి కేంద్రంలాగ భారీగా వ్యాట్‌ను తగ్గించాలని డిమాండ్ చేస్తున్నాము. లేదంటే బీజేపీ ప్రజల్లోకి ఈ విషయాన్ని బలంగా తీసుకువెళ్తుంది.’’ అని జీవీఎల్ నరసింహారావు పేర్కొన్నారు.