వేసిన క్యాసెట్టే మళ్లీ మళ్లీ ఎన్నాళ్లు వేస్తారు.. జగన్?: ఎంపీ జీవీఎల్‌

ముఖ్యమంత్రి వైఎస్ జగన్మోహన్ రెడ్డిని విశాఖపట్నం అభివృద్ధికి ఏ మాత్రం సహకరించకుండా పరిపాలన రాజధాని అంటూ ప్రజల్ని మభ్యపెడుతున్నారని భారతీయ జనతా పార్టీ (బీజేపీ) ఎంపీ జీవీఎల్‌ నరసింహరావు విమర్శించారు. అమరావతిలో మౌలిక సదుపాయాలు కల్పిస్తే కార్యాలయాలు నెలకొల్పుతామని కేంద్ర ప్రభుత్వ సంస్థలు లేఖలు రాస్తున్నా జగన్ సర్కారు మాత్రం పట్టించుకోవడం లేదని దుయ్యబట్టారు. అమరావతిలో అక్రమాలంటూ మూడేళ్లుగా ఆరోపణలు చేస్తున్నారే తప్ప.. ఒక్క ఆధారమైన బయటపెట్టారా అని నిలదీశారు.

ఈ మేరకు ఢిల్లీలో జీవీఎల్ నరసింహారావు మీడియాతో మాట్లాడుతూ.. మూడు రాజధానులు సాధ్యం కాదని వైసీపీ ప్రభుత్వానికి, ముఖ్యమంత్రి జగన్మోహన్ రెడ్డికి పూర్తిగా తెలుసన్నారు. అయినా కూడా మూడేళ్ల క్రితం వేసిన క్యాసెట్టే మళ్లీ మళ్లీ వేస్తున్నారని ఎద్దేవా చేశారు.

విశాఖపట్నంలో ఎందుకు రాజధాని పెడతామన్నారని ఎంపీ జీవీఎల్ నరసింహారావు ప్రశ్నించారు. విశాఖలో కొత్తగా ల్యాండ్‌ స్కామ్‌లు చేయాలనా అని నిలదీశారు. విశాఖపట్నం అభివృద్ధికి రాష్ట్ర ప్రభుత్వం నుంచి అనేక సహకారాలు రావాలని.. కానీ, అలా జరగట్లేదని విమర్శించారు. నిజమైన అభివృద్ధి కావాలంటే విశాఖపట్నం- చెన్నై ఇండస్ట్రియల్‌ కారిడార్ నిర్మాణం ఎందుకు నత్తనడకన నడుస్తోందని జీవీఎల్‌ నిలదీశారు.