జగన్ ఇంటి సమీపంలో పేలుడు.. తాడేపల్లిలో కలకలం..

తాడేపల్లిలో సీఎం వైఎస్ జగన్ నివాసం సమీపంలో జరిగిన పేలుడు స్థానికంగా కలకలం రేపింది. ఈ ఘటనలో ఓ మహిళకు తీవ్ర గాయాలయ్యాయి. గుంటూరు జిల్లా తాడేపల్లి ప్రకాష్ నగర్‌లోని ఓ ఇంట్లో ఈ తెల్లవారుజామున నాలుగు గంటల సమయంలో ఒక్కసారిగా పేలుడు సంభవించింది. పేలుడు ధాటికి ఇంటి తలుపులు, ఇనుప గేట్లు సైతం విరిగిపడ్డాయి. పెద్దశబ్దంతో పేలుడు జరగడంతో ఏం జరుగుతుందో అర్థంకాని పరిస్థితి నెలకొంది. స్థానికులు భయాందోళనకు గురయ్యారు.

పేలుడు జరిగిన సమయంలో ఇంట్లో ఉన్న పైడమ్మ అనే మహిళకు మంటలు అంటుకుని తీవ్ర గాయాలయ్యాయి. గాయపడిన మహిళను స్థానికులు విజయవాడ ప్రభుత్వాసుపత్రికి తరలించారు. సమాచారం అందుకున్న తాడేపల్లి పోలీసులు హుటాహుటిన ఘటనా స్థలికి చేరుకుని పరిస్థితిని సమీక్షించారు.

Also Read: ఏపీ హైకోర్టు: జగన్ సర్కార్ కొత్త స్ట్రాటజీ! కేంద్రంతో సంప్రదింపులు?

సీఎం జగన్ నివాసానికి కూతవేటు దూరంలోనే పేలుడు సంభవించడంతో పోలీసులు అప్రమత్తమయ్యారు. పేలుడుకి కారణాలను అన్వేషించే పనిలో పడ్డారు. ఇంట్లో ఉన్న ఫ్రిజ్ నుంచి గ్యాస్ లీకవడంతోనే పేలుడు సంభవించినట్లు ప్రాధమికంగా నిర్ధారించినట్లు తెలుస్తోంది. అయితే ఐరన్ గేట్లు కూడా విరిగిపడేంత స్థాయిలో పేలుడు జరగడంపై పోలీసులు దర్యాప్తు చేస్తున్నారు.