దూసుకొస్తున్న బురేవి తుఫాన్‌.. ఏపీలో ఆ జిల్లాలపై తీవ్ర ప్రభావం

బురేవి తుఫాన్ దూసుకొస్తోంది. నైరుతి బంగాళాఖాతంలోని తీవ్ర వాయుగుండం మరింత బలపడి ‘బురేవి’ తుఫాన్‌గా మారింది. బుధవారం సాయంత్రం ఇది ట్రింకోమలై(శ్రీలంక)కు తూర్పు ఈశాన్యంగా 70 కిలోమీటర్లు, పాంబన్‌(తమిళనాడు)కు తూర్పు ఆగ్నేయంగా 290 కిలోమీటర్ల దూరంలో కేంద్రీకృతమై ఉంది. గురువారం అర్ధరాత్రి లేదా శుక్రవారం తెల్లవారుజామున తమిళనాడులోని పాంబన్‌-కన్యాకుమారి మధ్య తీరాన్ని దాటుతుందని ఐఎండీ తెలిపింది. ఇది పశ్చిమ దిశగా పయనించి.. మరోసారి సముద్రంలోకి తుఫాన్‌గా ప్రవేశిస్తుంది.

ఈ ప్రభావం దక్షిణ తమిళనాడుపై తీవ్రంగా ఉంటుందని.. అత్యధికంగా మేఘాల్ని తోడుకుపోవడంతో దక్షిణ కోస్తాంధ్రలో ఒకట్రెండు చోట్ల బురేవీ ప్రభావం స్వల్పంగా ఉంటుందని వాతావరణ శాఖ తెలిపింది. ఈ ప్రభావంతో రాగల రెండు రోజుల పాటు కోస్తా, రాయలసీమల్లో ఒకట్రెండు చోట్ల తేలికపాటి నుంచి మోస్తరు వానలు కురిసే సూచనలున్నాయి. 3, 4న నెల్లూరు, ప్రకాశం, రాయలసీమల్లో ఒకట్రెండు చోట్ల భారీ వర్షాలు పడే అవకాశం ఉందని ఐఎండీ తెలిపింది.ప్రకాశం, నెల్లూరు, చిత్తూరు జిల్లాల్లో ఓ మోస్తరు నుంచి భారీ వర్షాలు కురిసే అవకాశం ఉందని తెలిపిందిమలయా ద్వీపకల్పంలో ఉన్న ఉపరితల ఆవర్తనం ప్రభావంతో శుక్రవారం దక్షిణ అండమాన్‌ సముద్రంలో అల్పపీడనం ఏర్పడనున్నదని వాతావరణ శాఖ అంచనా వేస్తోంది.