నారా లోకేష్ పర్యటన నిర్వాహకులపై కేసు నమోదు

అనంతపురంలో ఇటీవలే టీడీపీ జాతీయ ప్రధాన కార్యదర్శి, ఎమ్మెల్సీ నారా లోకేష్ పర్యటించారు. అనంతలో జేసీ కుటుంబాన్ని ఆయన పరామర్శించారు. మాజీ ఎమ్మెల్యే జేసీ ప్రభాకర్‌రెడ్డి, ఆయన కుమారుడు అస్మిత్‌రెడ్డి అరెస్టు నేపథ్యంలో మాజీ ఎంపీ జేసీ దివాకర్‌రెడ్డి, జేసీ పవన్‌ను పరామర్శించడానికి లోకేశ్‌ సోమవారం తాడిపత్రి వచ్చారు. కొవిడ్‌-19 నేపథ్యంలో ఆ కార్యక్రమానికి వచ్చిన కార్యకర్తలు, అభిమానుల్లో చాలామంది మాస్కులు ధరించకుండా, భౌతిక దూరం పాటించకుండా లాక్‌డౌన్‌ నిబంధనలు ఉల్లంఘించారని తాడిపత్రి టౌన్‌ ఎస్సై ఖాజా హుస్సేన్‌ ఫిర్యాదుచేశారు.

నారా లోకేశ్‌ పర్యటనకు ఏర్పాట్లు చేసిన ఇద్దరిపై అనంతపురం జిల్లా తాడిపత్రి పట్టణ పోలీసులు లాక్‌డౌన్‌ ఉల్లంఘన కేసు నమోదుచేశారు. కేసు అప్పుడే నమోదైనా.. ఆలస్యంగా వెలుగులోకి వచ్చింది. ఈ మేరకు కార్యక్రమ నిర్వాహకులైన రఘునాథ, సోమశేఖర్‌పై జాతీయ విపత్తుల నిర్వహణ చట్టం సెక్షన్‌ 51(బీ), ఐపీసీ సెక్షన్‌ 188 కింద సీఐ తేజోమూర్తి కేసు నమోదు చేశారు.