ఐఆర్‌ఎస్ కృష్ణకిషోర్‌ సస్పెన్షన్.. జగన్ సర్కార్‌పై క్యాట్ ఆగ్రహం

ఏపీ ఐఆర్ఎస్ అధికారి కృష్ణకిషోర్‌ సస్పెన్షన్‌పై క్యాట్ ఆగ్రహం వ్యక్తం చేసింది. ప్రభుత్వ అధికారి విషయంలో ప్రభుత్వం హద్దులు దాటిందని.. కేంద్రం ఆదేశించినా రిలీవ్ చేయకపోవడంపై అసహనం వ్యక్తం చేసింది. కృష్ణకిషోర్ రిలీవ్ అవుతానన్నా ఎందుకు చేయడంలేదని ప్రశ్నించింది. అలాగే కృష్ణ కిషోర్‌ సస్పెన్షన్‌లో నిబంధనలు పాటించలేదని.. ఆయనకు పెండింగ్‌లో ఉన్న జీతం వెంటనే చెల్లించాలని ఆదేశించింది. ఏపీ ప్రభుత్వం కేంద్రం ఆదేశాలను ఎందుకు పట్టించుకోలేదని క్యాట్‌ సీరియస్‌గా స్పందించింది. దీనిపై వివరణ ఇవ్వాలని క్యాట్‌ ఆదేశించింది.

10 రోజుల క్రితం ఏపీఈడీబీ సీఈవో కృష్ణకిషోర్‌‌ను ప్రభుత్వం సస్పెన్షన్‌ వేటు వేసింది. ఆయన ఈడీబీ సీఈవోగా ఉన్న సమయంలో నిధుల దుర్వినియోగం సహా ప్రభుత్వ అనుమతి లేకుండా రూ.కోట్ల విలువైన ప్రకటనలు జారీ చేశారన్న ఆరోపణలు వచ్చాయి. ఈ ఆరోపణలపై పరిశ్రమలు, మౌలిక వసతుల శాఖ నుంచి ప్రభుత్వం నివేదిక తెప్పించుకుంది.

తర్వాత కృష్ణ కిషోర్‌పై కేసు నమోదు చేయాలని సీఐడీ, ఏసీబీని ఆదేశించింది.. ఆరు నెలల్లోగా విచారణ పూర్తి చేయాలని సూచించింది. విచారణ పూర్తయ్యేవరకు అమరావతి విడిచి వెళ్లకూడదని కృష్ణ కిషోర్‌ను ప్రభుత్వం ఆదేశించింది. అలాగే ఆయనపై సెక్షన్ 188,403, 409, 120 బీ కింద సీఐడీ అధికారులు కేసు నమోదు చేశారు. దీంతో ఆయన క్యాట్‌ను ఆశ్రయించగా సస్పెన్షన్ ఉత్తర్వులపై ఈ నెల 24 వరకు స్టే విధించింది. తాజాగా మరోసారి కీలక ఉత్తర్వులు ఇచ్చింది.

కృష్ణ కిషోర్‌ టీడీపీ ప్రభుత్వం హయాంలో ఏపీ ఆర్థిక అభివృద్ధి మండలి సీఈవోగా పని చేశారు. ఏపీ ఎకనమిక్ డెవలప్‌మెంట్ బోర్డు (ఏపీఈడీబీ)కు సీఎం చైర్మన్‌గా వ్యవహరిస్తారు. మూడేళ్ల పదవీ కాలానికి గతంలో చంద్రబాబు ఆయన్ను ఆర్థిక అభివృద్ధి మండలి సీఈవోగా నియమించారు. 1990 బ్యాచ్‌కు చెందిన కృష్ణ కిశోర్.. అంతకు ముందు పౌర విమానయాన శాఖ మంత్రి అశోక గజపతి రాజు వద్ద సెక్రటరీగా పని చేశారు.