సీఎం జగన్‌ పిటిషన్.. సీబీఐ కోర్టు కీలక నిర్ణయం

సీబీఐ కోర్టులో వైఎస్ జగన్‌మోహన్‌రెడ్డి దాఖలు చేసిన పిటిషన్‌పై నాంపల్లి సీబీఐ కోర్టులో విచారణ జరిగింది. కోర్టుకు హాజరుపై తనకు మినహాయింపు ఇవ్వాలని జగన్‌ గతంలో హైకోర్టులో పిటిషన్‌ దాఖలు చేశారు.. కానీ కోర్టు కొట్టేసింది. దీంతో మళ్లీ అలాంటి పిటిషన్‌ను ఇప్పుడు ఎలా విచారణ చేపడతామని సీబీఐ కోర్టు ప్రశ్నించింది. పరిస్థితులు మారాయని విచారణ చేపట్టొచ్చని జగన్‌ తరపు లాయర్ కోర్టుకు సూచించారు. జగన్ విజ్ఞ‌ప్తిని పరిశీలించిన కోర్టు.. పిటిషన్‌ను సీబీఐ కోర్టు విచారణకు స్వీకరించింది.

ఆంధ్రప్రదేశ్ ముఖ్యమంత్రి వైఎస్ జగన్‌మోహన్‌రెడ్డి హైదరాబాద్ నాంపల్లి సీబీఐ కోర్టులో కొద్దిరోజుల క్రితం పిటిషన్ దాఖలు చేశారు. ఆస్తుల కేసులో వ్యక్తిగత హాజరు నుంచి తనకు మినహాయింపు ఇవ్వాలని ఆయన పిటిషన్‌లో కోరారు. కోర్టులో తనకు బదులుగా తన లాయర్ హాజరయ్యేలా అనుమతి ఇవ్వాలని జగన్‌మోహన్‌రెడ్డి విజ్ఞ‌ప్తి చేశారు.

ముఖ్యమంత్రి హోదాలో రాష్ట్ర పాలనా వ్యవహారాలు చూడాల్సిన బాధ్యత తనపై ఉన్నందున.. తనకు కోర్టు హాజరు నుంచి మినహాయింపు ఇవ్వాలని జగన్ పిటిషన్‌లో కోరారు. అలాగే రాష్ట్ర ఆర్థిక పరిస్థితి కూడా అంత మెరుగ్గా లేదని.. హైదరాబాద్ రావడానికి ఖర్చు ప్రభుత్వం భరిస్తుందన్నారు. ఓ విధంగా ఇది రాష్ట్ర ప్రభుత్వానికి అదనపు భారంగా మారిందని పిటిషన్‌లో ప్రస్తావించినట్లు తెలుస్తోంది.