YS Jagan.. ఇక ప్రతీ వారం కోర్టుకు జాగ్రత్తగా వెళ్లి రండి.. మాజీ ఎంపీ సెటైర్లు

ఏపీ సీఎం వైఎస్‌ జగన్‌కు సీబీఐ కోర్టులో నిరాశ ఎదురైన సంగతి తెలిసిందే. అక్రమాస్తుల కేసులో వ్యక్తిగత హాజరు నుంచి మినహాయింపు ఇవ్వాలని జగన్ దాఖలు చేసిన పిటిషన్‌ను న్యాయస్థానం కొట్టివేసింది. జగన్ పిటిషన్‌పై శుక్రవారం విచారణ జరిపిన సీబీఐ ప్రత్యేక న్యాయస్థానం.. ఈ మేరకు తీర్పు వెలువరించింది. సీఎంగా అధికారిక విధులు నిర్వహిస్తున్నందున ప్రతి వారం కోర్టుకు రావడం వల్ల ప్రజాధనం వృథా అవుతుందని, వ్యక్తిగత హాజరు నుంచి మినహాయింపు ఇవ్వాలని జగన్ కోరారు. కానీ కోర్టు మాత్రం సీబీఐ వాదనలను సమర్థించింది.

సీఎంగా ప్రతి వారం కోర్టులో హాజరు కావాల్సి రావడం జగన్‌కు ఓ రకంగా ఇబ్బందికరమే. ప్రతిపక్షాలు ఈ విషయంలో ఆయన్ను టార్గెట్ చేసే అవకాశం ఉంది. ఇప్పటికే జనసేన అధినేత పవన్ కళ్యాణ్.. జగన్‌పై సెటైర్లు వేశారు. టీడీపీ నేతలు కూడా సీఎంను టార్గెట్ చేస్తున్నారు. జగన్ పిటిషన్‌ను కోర్టు డిస్మిస్ చేయడంపై అమలాపురం మాజీ ఎంపీ హర్షకుమార్ స్పందించారు.

దేవుడు మరోసారి న్యాయం చెప్పాడని హర్షకుమార్ ఫేస్ బుక్‌లో పోస్టు చేశారు. ‘‘తనని ప్రశ్నించిన వారిని పోలీసులతో ఇబ్బంది పెడుతూ జైల్లో పెట్టించాలని కుయుక్తులు పన్నిన వైఎస్ జగన్మోహనరెడ్డి గారికి ప్రతి వారం మాములుగా కోర్టు.. అదే CBI కోర్ట్ కు రమ్మని తీర్పు ఇవ్వడం శుభసూచకం. ఇక ప్రతీ వారం జాగ్రత్తగా వెళ్లి రండ’’ని హర్షకుమార్ వ్యంగ్యంగా స్పందించారు.
గోదావరిలో కచ్చలూరు వద్ద బోటు బోల్తా పడిన తర్వాత.. ఆ బోటు ప్రమాదం విషయమై హర్ష కుమార్ సంచలన వ్యాఖ్యలు చేసిన సంగతి తెలిసిందే. బోటులో ఉంది 73 మంది కాదు 93 మంది అని చెప్పిన ఆయన.. మంత్రి అవంతి శ్రీనివాస్ ఒత్తిడితోనే ఆ బోటుకు అనుమతి ఇచ్చారని ఆరోపించారు. ఈ విషయమై ఆయన సుప్రీం కోర్టులో పిల్ దాఖలు చేశారు.

కాగా విధి నిర్వహణలో ఉన్న ప్రభుత్వ ఉద్యోగులను తోసి వేయడం, బెదిరించడం, మహిళా ఉద్యోగులపట్ల అసభ్యంగా ప్రవర్తించడం, పరుష పదజాలంతో దూషించడం లాంటి అభియోగాలతో హర్షకుమార్‌పై ఏపీ పోలీసులు కేసులు నమోదు చేశారు. తనపై ప్రభుత్వం తప్పుడు కేసులు మోపిందని ఆయన ఆరోపిస్తున్నారు.