చంద్రబాబు అరెస్ట్.. పోలీస్ వాహనం కీ మిస్సింగ్

టీడీపీ అధినేత, మాజీ ముఖ్యమంత్రి చంద్రబాబు నాయుడు అరెస్టుతో విజయవాడలో ఉద్రిక్తత నెలకొంది. బెంజ్ సర్కిల్ నుంచి ఆటోనగర్ వరకూ ర్యాలీగా బయలుదేరిని జేఏసీ, అఖిలపక్ష నేతలను పోలీసులు అరెస్టు చేశారు. చంద్రబాబు సహా, విజయవాడ ఎంపీ కేశినేని నాని, మాజీ మంత్రి అచ్చెన్నాయుడు, టీడీపీ ఎమ్మెల్యే రామానాయుడు, వైవీబీ రాజేంద్రప్రసాద్ తదితరులను పోలీసులు అదుపులోకి తీసుకుని పోలీసు వాహనం ఎక్కించారు.

చంద్రబాబును ఎక్కించిన తరువాత నాటకీయ పరిణామాలు చోటుచేసుకున్నాయి. పోలీసు వాహనం తాళం కనిపించలేదంటూ సుమారు గంటకుపైగా పోలీసులు అక్కడే బస్సును నిలిపివేశారు. తాళం కనిపించకపోవడంతో ఇతర తాళాలతో వాహనాన్ని స్టార్ట్ చేసే ప్రయత్నం చేసినా ప్రయోజనం లేకపోయింది. దీంతో పోలీసులు మరో వాహనాన్ని తెప్పించే పనిలో పడ్డారు.

Also Read: చంద్రబాబు అరెస్ట్.. బెంజి సర్కిల్ వద్ద ఉద్రిక్తత

చంద్రబాబును అదుపులోకి తీసుకుని తరలిస్తున్న బస్సు తాళం కనిపించకుండా పోవడం పలు అనుమానాలకు తావిస్తోంది. చంద్రబాబును బస్సులో ఎక్కించడంతో టీడీపీ కార్యకర్తలు పెద్దఎత్తున బస్సును చుట్టుముట్టి నినాదాలు చేస్తున్నారు. బస్సును ముందుకు కదలకుండా అడ్డుపడ్డారు. ఈ క్రమంలోనే బస్సు తాళం కనిపించకుండా పోయినట్లు తెలుస్తోంది. ఒకవేళ కార్యకర్తలెవరైనా వాహనం తాళం తీశారా? బస్సు డ్రైవర్ ఏం చేస్తున్నారు? ఎందుకు తాళం కనిపించకుండా పోయింది? వంటి సందేహాలు తలెత్తుతున్నాయి.