YSRCP మహిళా ఎమ్మెల్యేపై ఎఫ్‌బీలో అసభ్యకర పోస్టు.. ఇద్దరు అరెస్ట్, కొత్త చట్టం ప్రకారం..

చిలకలూరిపేట వైఎస్సార్సీపీ ఎమ్మెల్యే విడదల రజనీపై ఫేస్‌బుక్‌లో అభ్యంతరకర పోస్టులు పెట్టిన ఇద్దర్ని పోలీసులు అరెస్ట్ చేశారు. నెల్లూరు జిల్లాకు వీరిద్దర్నీ అరెస్ట్ చేసి చిలకలూరిపేటకు తీసుకొచ్చారు. నెల్లూరు జిల్లా విడవలూరుకు చెందిన సత్యవోలు హరిప్రసాద్‌రెడ్డి అలియాస్‌ సత్యంరెడ్డి.. ఎమ్మెల్యే రజనీ ఫొటోపై ఫేస్‌బుక్‌లో అభ్యంతరకర వ్యాఖ్యలతో పోస్టింగ్‌ పెట్టాడు. దాని కింద అదే పంతగాని ప్రవీణ్ అనే వ్యక్తి కూడా అసభ్యకర కామెంట్ పోస్టు చేశాడు.

చిలకలూరిపేటకు చెందిన వైఎస్సార్సీపీ నేత మారుబోయిన నాగరాజు ఫిర్యాదు మేరకు శనివారం రాత్రి చిలకలూరిపేట అర్బన్‌ పోలీస్‌స్టేషన్‌లో 509 ఐపీసీ, సెక్షన్‌ 67 ఐటీ యాక్ట్‌-2008 కింద ఈ ఇద్దరిపై కేసు నమోదు చేశారు. ఆదివారం వారి స్వగ్రామాల్లో సత్యంరెడ్డి, ప్రవీణ్‌ను అరెస్టు చేసి చిలకలూరిపేట అర్బన్‌ పోలీస్‌ స్టేషన్‌కు తీసుకొచ్చారు. సోమవారం కోర్టులో హాజరుపరిచే అవకాశముంది.

టీడీపీ కార్యకర్త అయిన సత్యం రెడ్డిని అదుపులోకి తీసుకున్న ఘటనపై మాజీ మంత్రి సోమిరెడ్డి చంద్రమోహన్ రెడ్డి వెంటనే స్పందించారు. వైసీపీ ప్రభుత్వం చేపట్టిన కక్ష సాధింపు చర్యలపై పార్టీ అధిష్టానంతో పాటు చిలకలూరిపేట నేత, మాజీ మంత్రి ప్రత్తిపాటి పుల్లారావుతో ఆయన మాట్లాడారు. సత్యంరెడ్డికి పార్టీ పూర్తి అండగా ఉంటుందన్నారు.

సోషల్‌మీడియా ద్వారా మహిళలను వేధించడం, వారిపై అసభ్య పోస్టింగులు పెట్టడం లాంటివి చేస్తే ఐపీసీ ప్రకారం ఇప్పటివరకూ శిక్షలు నిర్దిష్టంగా లేవు. ఇటీవలే ఏపీ అసెంబ్లీ ఆమోదించిన చట్టం ప్రకారం.. మెయిల్స్‌ ద్వారా లేదా సోషల్‌ మీడియా ద్వారా లేదా ఇతర డిజిటల్‌ మధ్యమాల ద్వారా మహిళల పట్ల అసభ్యంగా ప్రవర్తిస్తే.. మొదటి తప్పునకు రెండేళ్లు, ఆ తర్వాత తప్పునకు నాలుగేళ్లు శిక్ష విధించేలా ఐపీసీలో 354 (ఇ) అనే కొత్త సెక్షన్‌ను తీసుకొచ్చారు.