ఏపీ: సీఐ ఆత్మహత్య.. విజయవాడలో కలకలం

పోలీసుల అధికారి ఆత్మహత్య విజయవాడలో కలకలం రేపింది. హనుమాన్‌పేట పోలీస్‌ క్వార్టర్స్‌లోని తన నివాసంలో సీఐ సూర్యనారాయణ ఫ్యాన్‌కు ఉరి వేసుకుని ఆత్మహత్యకు పాల్పడ్డారు. 1989 బ్యాచ్‌కు చెందిన సూర్యనారాయణ గత కొంతకాలంగా విజయవాడ ఏఆర్‌ గ్రౌండ్స్‌లో సీఐగా బాధ్యతలు నిర్వహించారు. ఏలూరు రేంజ్ అధికారిగా ఉన్న సూర్యనారాయణ ప్రస్తుతం రేంజ్ వీఆర్‌లో ఉన్నట్లు తెలుస్తోంది.

సీఐ ఆత్మహత్యపై సందేహాలు వ్యక్తమవడంతో అనుమానాస్పద మృతిగా పోలీసులు కేసు నమోదు చేశారు. పోలీసు శాఖ పదోన్నతుల్లో అన్యాయం జరగడమే సూర్యనారాయణ ఆత్మహత్యకు కారణమన్న వాదనలు వినిపిస్తున్నాయి. ఆయన బ్యాచ్‌కి చెందిన పలువురు అధికారులకు డీఎస్పీలుగా ప్రమోషన్లు వచ్చినట్లు తెలుస్తోంది. తనకు ప్రమోషన్ రాకపోవడాన్ని ఆయన అవమానంగా ఫీలవుతున్నారట. ఉద్దేశపూర్వకంగానే తనకు ప్రమోషన్లు రాకుండా అడ్డుకుంటున్నారని సీఐ సూర్యనారాయణ కొద్దికాలంగా మనస్థాపానికి గురైనట్లు ప్రచారం జరుగుతోంది.

Also Read: విశాఖ మన్యంలో దారుణం.. గ్రామ నడిబొడ్డున వ్యక్తి సజీవ దహనం..

ప్రమోషన్లలో అన్యాయం జరగడం, ఇటీవల అనారోగ్యానికి గురికావడంతో సూర్యనారాయణ మరింత కుంగిపోయినట్లు తెలుస్తోంది. అందుకే ఆయన ఆత్మహత్యకు పాల్పడి ఉండొచ్చన్న అనుమానాలు వ్యక్తమవుతున్నాయి. అనారోగ్య కారణాలతోనే ఆత్మహత్య చేసుకున్నారా? లేక ఇంకేమైనా కారణాలున్నాయా? అనే కోణంలోనూ విచారణ జరపనున్నట్లు పోలీసులు చెబుతున్నారు.

Read Also: కాళ్లరిగేలా తిరిగినా కనికరమే లేదు! కళాశాలలోనే ‘అటెండర్’ ఆత్మహత్య

ఆత్మహత్య చేసుకున్న సీఐ సూర్యనారాయణ కుటుంబసభ్యులను డీసీపీ విజయరావు పరామర్శించారు. సీఐ నివాసానికి వెళ్లి ఆత్మహత్యకు గల కారణాలపై ఆరా తీశారు. అనంతరం డీసీపీ మాట్లాడుతూ సూర్యనారాయణ లివర్ సోరియాసిస్ వ్యాధితో బాధపడుతున్నారని అన్నారు. కొంతకాలంగా ఆయన మానసిక స్థితి కూడా బాగాలేదని, ఆయన ట్రీట్‌మెంట్ తీసుకుంటున్నారని చెప్పారు. సూర్యనారాయణ కుటుంబానికి పోలీస్‌ శాఖ అండగా ఉంటుందని భరోసా ఇచ్చారు.