‘జగన్ జైలుకెళ్లడం పక్కా.. సీఎం రేసులో ఆ నలుగురు’

ముఖ్యమంత్రి వైఎస్ జగన్‌మోహన్‌రెడ్డి కచ్చితంగా జైలుకు వెళ్తారని నిపుణులు చెబుతున్నారని టీడీపీ అధికార ప్రతినిధి పంచుమర్తి అనురాధ సంచలన వ్యాఖ్యలు చేశారు. వైఎస్ జగన్ జైలుకెళ్తే సీఎం కావాలని నలుగురు ఉవ్విళ్లూరుతున్నారని వ్యాఖ్యానించారు. మంత్రులు బుగ్గన రాజేంద్రనాథ్‌రెడ్డి, బొత్స సత్యానారాయణ, పెద్దిరెడ్డి రామచంద్రారెడ్డి, ఎమ్మెల్యే రోజా సీఎం పీఠంపై కన్నేశారని అనురాధ వ్యాఖ్యానించారు.

అందుకే ప్రతిపక్ష నేత చంద్రబాబునాయుడును దూషిస్తూ మాట్లాడుతున్నారని తెలిపారు. ఈ మేరకు మంగళవారం (జనవరి 28) ఆమె మీడియాతో మాట్లాడుతూ.. ప్రజల ఆస్తులను దోపిడీ చేసిన కేసుల్లో నిందితుడిగా ఉన్న సీఎం జగన్‌ని ఏమనాలని ఆమె ప్రశ్నించారు.

పైరవీల కోసమే సచివాలయం అంటూ మంత్రి కన్నబాబు చీప్‌గా మాట్లాడుతున్నారని అనురాధ ఆగ్రహం వ్యక్తం చేశారు. రద్దుల రెడ్డిగా.. సీఎం జగన్‌ చరిత్రలో నిలిచిపోతారని తీవ్ర వ్యాఖ్యలు చేశారు. అసెంబ్లీ సాక్షిగా 5 కోట్ల మంది ప్రజలను మోసం చేశారని విమర్శించారు. మండలిలో 20 మందికి పైగా బడుగు, బలహీనవర్గాల వారే ఉన్నారని, బీసీలను అభివృద్ధి చేస్తామని చెప్పి.. వైసీపీ వారి గొంతు కోస్తోందని విమర్శించారు. మండలి రద్దుపై సీఎం జగన్‌ పునః సమీక్షించి, నిర్ణయాన్ని వెనక్కి తీసుకోవాలని అనురాధ డిమాండ్ చేశారు.