గుజరాత్‌లో చిక్కుకున్న 5 వేల మంది ఆంధ్రులు.. సీఎం జగన్ కీలక నిర్ణయం

దేశవ్యాప్తంగా అమలవుతున్న లాక్‌ డౌన్‌ వల్ల గుజరాత్‌లో చిక్కుకుపోయిన ఆంధ్రప్రదేశ్‌కు చెందిన మత్స్యకారుల సమస్యలపై ముఖ్యమంత్రి వైఎస్ జగన్మోహన్‌రెడ్డి వాయువేగంతో స్పందించారు. వారికి అన్ని రకాలుగా సాయం అందించాలని అధికారులను ఆదేశించారు. కరోనా వైరస్ (కోవిడ్ 19) కట్టడిలో భాగంగా దేశవ్యాప్తంగా 21 రోజుల లాక్‌డౌన్‌ విధించడంతో ఏపీకి చెందిన 5 వేల మంది మత్స్యకారులు గుజరాత్‌లోని వెరావల్‌లో చిక్కుకుపోయారు.

అయితే అక్కడ తాము పడుతున్న ఇబ్బందులను వారు ఏపీ ప్రభుత్వానికి విన్నవించారు. దీనిపై తక్షణమే స్పందించిన సీఎం వైఎస్‌ జగన్‌.. వారికి సాయం అందిచాల్సిందిగా ప్రభుత్వ ప్రత్యేక కార్యదర్శి సతీష్‌ చంద్రను ఆదేశించారు. దీంతో అధికారులు శ్రీకాకుళం నుంచి ప్రత్యేక బృందాన్ని ఏర్పాటు చేసి గుజరాత్‌కు పంపించారు.

ఆ బృందం ఏపీకి చెందిన జాలర్లకు వసతి, ఆహారంతో పాటు అన్ని సౌకర్యాలు ఏర్పాటు చేసింది. జాలర్ల యోగ క్షేమాలే తమకు ముఖ్యమని ప్రభుత్వం తెలిపింది. వారు రాష్ట్రానికి తిరిగి వచ్చేంత వరకు వారి బాగోగులు చూసుకుంటామని స్పష్టం చేసింది.