సీఎం జగన్ మంచి మనసు.. అనారోగ్య బాధితులకు సత్వర సాయం

ముఖ్యమంత్రి వైఎస్ జగన్మోహన్ రెడ్డి మరోసారి మంచి మనసు చాటుకున్నారు. అనకాపల్లి జిల్లా ఎలమంచిలి పర్యటనలో అనారోగ్య బాధితులను కలిసి నేరుగా వారి సమస్యలను తెలుసుకుని అప్పటికప్పుడు జిల్లా కలెక్టర్‌కు ఆదేశాలు జారీ చేశారు. ముఖ్యమంత్రి ఆదేశాలతో జిల్లా కలెక్టర్‌ రవి పట్టన్‌ షెట్టి బాధితులతో మాట్లాడి అవసరమైన సాయం చేశారు.


మెరుగైన చికిత్సకు సాయం
ఎలమంచిలి కుమ్మరివీధికి చెందిన కొండమంచిలి వాణి అనే బాలికకు చిన్నప్పటి నుంచి మాటలు రాకపోవడంతో పాటు చెవులు వినపడడం లేదు. అయితే, మెరుగైన చికిత్స అందించేందుకు తగిన ఆర్థిక స్తోమత లేదని ముఖ్యమంత్రి వైఎస్ జగన్మోహన్ రెడ్డికి వాణి అమ్మమ్మ విన్నవించుకున్నారు. దీంతో తక్షణ సహాయం చేసేందుకు సీఎం జగన్మోహన్ రెడ్డి హామీ ఇచ్చారు.


బైక్ ప్రమాదంలో గాయపడ్డ వ్యక్తికి..
ఎస్‌ రాయవరం మండలం సైతారుపేటకు చెందిన కలగా శివాజీ.. మోటర్‌ బైక్‌ ప్రమాదంలో తీవ్రంగా గాయపడి చికిత్స పొందాడు. ఆ తర్వాత క్రమేపీ ఇతర అవయవాలు పని చేయకపోవడంతో వీల్‌చైర్‌కే పరిమితమయ్యాడు. తనకు మెరుగైన వైద్య చికిత్స అందించేందుకు తగిన ఆర్థిక స్తోమత లేదని శివాజీ కుటుంబ సభ్యులు సీఎం జగన్‌కు విన్నవించుకున్నారు. దీంతో తక్షణ సహాయానికి సీఎం జగన్ హమీ ఇచ్చారు.

ముఖ్యమంత్రి ఆదేశాలతో అనకాపల్లి జిల్లా కలెక్టర్‌ రవి పట్టన్‌ షెట్టి.. సీఎం రిలీఫ్‌ పండ్‌ నుంచి రూ. లక్ష చొప్పున బాధితులు ఇద్దరికీ మంజూరు చేశారు. ఆ చెక్కులను అనకాపల్లి ఆర్డీవో ఏ.జి. చిన్నికృష్ణ స్థానిక తహసీల్దార్‌ కార్యాలయంలో బాధితులకు అందజేశారు. సీఎం స్పందనతో బాధిత కుటుంబాలు సంతోషాన్ని వ్యక్తం చేశాయి. తమ సమస్యపై ఇంత త్వరగా ముఖ్యమంత్రి స్పందించడం జీవితాంతం మరువలేమన్నారు.