10.85 లక్షల మంది ఖాతాల్లోకి డబ్బు.. సీఎం జగన్ గుడ్ న్యూస్

ఆంధ్రప్రదేశ్ ప్రభుత్వం ఆర్థిక సమస్యలతో ఇబ్బందులు పడుతున్నా.. ముఖ్యమంత్రి వైఎస్ జగన్మోహన్ రెడ్డి మాత్రం సంక్షేమ పథకాల అమలులో వెనకడుగు వేయడం లేదు. తాజాగా, మరో పథకం అమలుకు సీఎం జగన్ ముహూర్తం ఫిక్స్ చేశారు. విద్యార్థులు, తల్లిదండ్రులకు మేలు చేకూర్చే జగనన్న విద్యా దీవెన పథకాన్ని అమలు చేయనున్నారు. ఇందులో భాగంగా గురువారం బాపట్ల జిల్లాలో పర్యటించనున్న సీఎం జగన్మోహన్ రెడ్డి.. విద్యా దీవెన మూడో త్రైమాసిక నగదును విడుదల చేయనున్నారు.

గురువారం ఉదయం 9.30 గంటలకు తాడేపల్లి నుంచి బయల్దేరనున్న సీఎం జగన్.. ఉదయం 10.10 గంటలకు బాపట్ల చేరుకుంటారు. అనంతరం ఉదయం 10.35 నుంచి మధ్యాహ్నం 12.10 గంటల వరకు బాపట్ల ఆర్ట్స్‌ అండ్‌ సైన్స్‌ కాలేజ్‌ గ్రౌండ్‌లో నిర్వహించనున్న జగనన్న విద్యాదీవెన కార్యక్రమంలో పాల్గొని, బహిరంగ సభలో ప్రసగించనున్నారు. తర్వాత, మధ్యాహ్నం 1.20 గంటలకు తిరిగి తాడేపల్లి చేరుకోనున్నారు.

ఉన్నత విద్య అభ్యసించే విద్యార్థులకు సంబంధించిన ఫీజు రీయింబర్స్‌ను గత ప్రభుత్వాలు నేరుగా కళాశాలలకే అందజేస్తుండగా.. ముఖ్యమంత్రి జగన్మోహన్ రెడ్డి అధికారంలోకి వచ్చాక ఆ డబ్బును విద్యార్థి తల్లుల ఖాతాల్లోకి జమ చేస్తున్నారు. తాజాగా, విద్యా దీవెన పథకం కింద దాదాపు 10.85 లక్షల మంది విద్యార్థుల తల్లుల ఖాతాల్లో దాదాపు రూ. 709 కోట్లు జమ చేయనున్నారు.