ఇది కుల ఘర్షణ కాదు, ప్రభుత్వం మీదున్న వ్యతిరేకతను ప్రతిబింబిస్తోంది: నారాయణ

కోనసీమ జిల్లాకు ముందే అంబేద్కర్ పేరు పెట్టి ఉంటే ఏ సమస్యలు ఉండేవి కావని సీపీఐ జాతీయ కార్యదర్శి కే నారాయణ అన్నారు. దీన్ని కేవలం కుల ఘర్షణగా మాత్రమే చూడలేమని ఆయన అన్నారు. వైఎస్ జగన్మోహన్ రెడ్డి ప్రభుత్వంపై ఉన్న వ్యతిరేకత కారణంగానే కోనసీమ భగ్గుమందని నారాయణ వ్యాఖ్యానించారు. ఈ మేరకు బుధవారం (మే 25) ఓ వీడియోను విడుదల చేశారు.‘కోనసీమ జిల్లా వివాదం చిలికి చిలికి గాలివానలా మారింది. దీన్ని అక్కడున్న కుల ఘర్షణగా చూడటానికి వీల్లేదు. ఓవరాల్‌గా ఈ ప్రభుత్వం మీద ఉన్న వ్యతిరేకతను ఇది ప్రతిబింబిస్తోంది. ఎక్కడ ఛాన్స్ దొరికితే అక్కడ ప్రభుత్వ వ్యతిరేకతను ప్రతిబింబించే పద్ధతిలో ఉద్యమాలు వస్తాయి. ప్రజాస్వామ్యంలో ఎప్పుడైనా ప్రతిపక్షాలను లేకుండా చేస్తారో, ప్రతిపక్షాలకు సంబంధించిన భావాలు లేకుండా చేస్తారో ఇలాంటి ఉద్యమాలు వస్తాయి. ఎక్కడ ఛాన్స్ దొరికితే అక్కడ తిరగబడతారు’ అని నారాయణ అన్నారు.

జిల్లాల విభజన సమయంలోనే కోనసీమ జిల్లాకు అంబేద్కర్ పేరు పెట్టాలని డిమాండ్లు వచ్చినప్పటికీ.. సీఎం జగన్ పట్టించుకోకుండా ఊగిసలాట ధోరణిలో వ్యవహరించడం వల్ల ఈ పరిస్థితి ఏర్పడిందని నారాయణ అన్నారు. చివరికిది మంత్రి విశ్వరూప్ ఇంటి దహనం వరకు వెళ్లిందని పేర్కొన్నారు.

ప్రతిపక్షాలను లేకుండా చేయాలని చూస్తున్న ప్రభుత్వ విధానాలపై వ్యతిరేక ఉద్యమాలు ఇప్పటికే ప్రారంభం అయ్యాయని సీపీఐ నారాయణ అన్నారు. ఏ విషయంలోనైనా స్పష్టత ప్రదర్శించే సీఎం జగన్.. ఇలా ఎందుకు చేశారని ఆయన ప్రశ్నించారు. ‘అనేక జిల్లాల్లో పేర్ల విషయంలో వివాదాలొచ్చినా ఆ సమయంలో మొండిగా వ్యవహరించి ఇప్పుడెందుకు రాజీపడ్డారు? ఓట్లు, రాజకీయ ఎత్తుగడలతో సంకుచిత వైఖరిని ప్రదర్శించారు. ఫలితంగానే కోనసీమలో ఘర్షణలు వచ్చామి’ అంటూ సంచలన ఆరోపణలు చేశారు నారాయణ.

ఈ విషయంలో ఆత్మస్తుతి, పరనింద పనికి రాదని వైఎస్సార్‌సీపీ ప్రభుత్వానికి నారాయణ సూచించారు. ప్రజాస్వామ్య పద్ధతిలో పాలన సాగిస్తే ఇలాంటి పరిస్థితి ఉండదన్నారు. ఇప్పటికైనా ఆత్మపరిశీలన చేసుకోవాలని నారాయణ హితవు పలికారు.

Also Read:

✦ మనసు మరొకరిపై.. పెళ్లి బావతో, ప్రేమజంట కథ విషాదాంతం

✦ కులాల ఓట్ల కోసం రాజకీయ ఆట.. కోనసీమ కుంపటికి కారణమిదేనా?