YS Jagan కు అంత ఉలుకెందుకు.. 2 రోజుల ముందే అరెస్టు చేస్తారా.. సీపీఐ నేత ఫైర్

ప్రజా ఉద్యమాలు అంటే ముఖ్యమంత్రి వైఎస్ జగన్మోహన్ రెడ్డికి ఎందుకంత ఉలుకని కమ్యూనిస్టు పార్టీ ఆఫ్ ఇండియా (సీపీఐ) రాష్ట్ర కార్యదర్శి రామకృష్ణ సూటిగా ప్రశ్నించారు. ఈ మేరకు ఆదివారం సీపీఐ నేత రామకృష్ణ మీడియాతో మాట్లాడుతూ.. కేంద్ర, రాష్ట్ర ప్రభుత్వాలు నిత్యావసర ధరలను భారీగా పెంచి, పన్నుల భారాన్ని ప్రజలపై గుదిబండగా మోపాయని విమర్శించారు.

ఈ నెల 9వ తేదీన సీపీఐ ఛలో అమరావతికి పిలుపునిస్తే రెండు రోజుల ముందు నుంచే రాష్ట్రవ్యాప్తంగా పోలీసులు ముందస్తు అరెస్టులకు సిద్ధపడ్డారని రామకృష్ణ తీవ్ర ఆగ్రహం వ్యక్తం చేశారు. అధిక ధరలను అరికట్టలేని వైసీపీ ప్రభుత్వం.. సీపీఐ, ప్రజా సంఘాల నేతలకు నోటీసులు ఇవ్వటం, అరెస్టులు చేయడం దుర్మార్గమని మండిపడ్డారు.

ముఖ్యమంత్రి వైఎస్ జగన్మోహన్ రెడ్డికి చిత్తశుద్ధి ఉంటే.. పెంచిన ఆస్తి, చెత్త పన్నులను వెంటనే విరమించుకోవాలని రామకృష్ణ డిమాండ్ చేశారు. వంట నూనెలు, నిత్యావసర వస్తువుల ధరల పెంపును అరికట్టాలని, పెట్రోల్, డీజిల్, గ్యాస్ ధరలపై అధిక సుంకాల భారాన్ని తగ్గించాలని కోరారు. అలాగే, అరెస్టు చేసిన సీపీఐ నేతలను తక్షణమే విడుదల చేయాలని రామకృష్ణ డిమాండ్ చేశారు.