YS Jagan సొంత జిల్లాలో 20 నుంచి లాక్ డౌన్ ఆంక్షల సడలింపు.. డిప్యూటీ సీఎం ప్రకటన

ముఖ్యమంత్రి వైఎస్ జగన్మోహన్‌రెడ్డి సొంత జిల్లా అయిన కడపలో లాక్‌ డౌన్‌ అమలుకు సంబంధించి ఈ నెల 20వ తేదీ నుంచి ఆక్షల సడలింపుల విషయంలో తప్పక నిబంధనలు పాటించాలని రాష్ట్ర డిప్యూటీ సీఎం ఎస్‌బీ అంజాద్‌ బాషా ఆదేశించారు. ఈ మేరకు కడపలోని కలెక్టర్‌ వీసీ హాలు నుంచి కోవిడ్‌–19 జిల్లా స్థాయి టాస్క్‌ఫోర్స్‌ కమిటీ మండల స్థాయి అధికారులతో ఉప ముఖ్యమంత్రి వీడియో కాన్ఫరెన్స్‌ నిర్వహించారు. ఈ సందర్భంగా అంజాద్ బాషా మాట్లాడుతూ.. ఇప్పటివరకు రోజుకు కేవలం 90 మాత్రమే త్రోట్‌ శాంపిల్‌ సేకరించే వారని, ఇకపై ఐదింతలు పెంచే పద్ధతులను అమలు చేస్తున్నట్లు తెలిపారు. ట్రూనాట్‌ కిట్స్‌ ద్వారా 200 నుంచి 280 వరకు శాంపిల్స్‌ పరీక్షించేందుకు వీలుందన్నారు.

ఈ నెల 20 నుంచి నిర్దేశిత ప్రాంతాల్లో ప్రకటించే లాక్‌ డౌన్‌ సడలింపులను నిబంధనల మేరకు పాటించాలని ఆయన సూచించారు. జిల్లా కలెక్టర్‌ హరికిరణ్‌ మాట్లాడుతూ.. వచ్చే సోమవారం నుంచి జిల్లాలోని 9 కంటైన్మెంట్‌ జోన్లు మినహా పాజిటివ్‌ కేసులు నమోదు కాని, గ్రామీణ ప్రాంతాల్లో లాక్ డౌన్ సడలింపులు వర్తిస్తాయన్నారు. కనీస అవసరాలకు, సాధారణ జీవనానికి, గ్రామీణ ఉత్పత్తులకు ఇక్కడ అంతరాయం ఉండబోదన్నారు. నిత్యావసరాలు, అత్యవసర సేవలకు ఇబ్బంది లేకుండా చర్యలు చేపట్టాలన్నారు. జిల్లాలో 8 లక్షల మందికి ఫీవర్‌ సర్వే నిర్వహించగా, 2 వేల మందికి పైగా శాంపిల్‌ టెస్టింగ్‌ అవసరమైనట్లు గుర్తించామన్నారు. ఈ నెల 21వ తేదీ లోపు వీరందరికీ పరీక్షలు నిర్వహిస్తామని కలెక్టర్ చెప్పారు.

కంటైన్మెంట్‌ గుర్తింపు ఇలా..కరోనా పాజిటివ్‌ కేసులున్న ప్రాంతాన్ని రెడ్‌జోన్‌గా పరిగణిస్తారు. వైరస్‌ ప్రభావిత ప్రాంతంలో 300 మీటర్ల నుంచి 400 మీటర్లు కేటాయిస్తారు. రెడ్‌ జోన్‌ చివరి నుంచి 3 కిలోమీటర్ల దూరాన్ని కోర్‌ జోన్‌గా పరిగణిస్తారు. కోర్‌ జోన్‌ చివరి నుంచి 5 కిలో మీటర్ల దూరం వరకు బఫర్‌ జోన్‌గా వ్యవహరిస్తారు. ఈ మూడు జోన్‌లను కలిపి కంటైన్మెంట్‌ జోన్‌ (అదుపు చేయడం)గా వ్యవహరిస్తారు. కడప నగరం చుట్టూ 8.4 కిలో మీటర్ల మేర కంటైన్మెంట్‌ జోన్‌గా వ్యవహరిస్తారు. ఈ కంటైన్మెంట్ జోన్లు కడప నగరంలో రెండు, ప్రొద్దుటూరులో 2, వేంపల్లెలో ఒకటి, పులివెందులలో ఒకటి, ఎర్రగుంట్లలో ఒకటి, బద్వేలులో 1, మైదుకూరులో ఒకటి ఉన్నాయి.