కర్నూలు వైసీపీలో రచ్చ.. ముదిరిన ఆధిపత్య పోరు!

వైఎస్సార్ కాంగ్రెస్ పార్టీలో విబేధాలు భగ్గుమన్నాయి. కర్నూలు నియోజకవర్గంలో ఆధిపత్య పోరు బయటపడింది. మాజీ ఎమ్మెల్యే ఎస్వీ మోహన్‌రెడ్డి ఇతర పార్టీల కార్యకర్తలను వైసీపీలోకి చేర్చుకుంటున్నట్లు తెలుస్తోంది. దీంతో ప్రస్తుత ఎమ్మెల్యే హఫీజ్‌ఖాన్ తీవ్ర ఆగ్రహం వ్యక్తం చేశారు. ఎమ్మెల్యేగా తానుండగా నియోజకవర్గంలో ఎస్వీకి ఏం పని అని మండిపడ్డారు. ఈ మేరకు ఎస్వీ మోహన్‌రెడ్డికి లేఖ రాశారు.

‘‘నా అనుమతి లేకుండా పార్టీలో చేరికలు చెల్లవు. సామాన్య కార్యకర్త అంటూనే నాశనం కోరతారా? నువ్వే ఓ కార్యకర్తవు.. ఏ అధికారంతో ఇతర పార్టీల కార్యకర్తలను చేర్చుకుంటావు. నీకు ధైర్యం ఉంటే సొంత నియోజకవర్గం పత్తికొండకు వెళ్లి కార్యకర్తలను చేర్పించుకోవాలి.’’ అని హఫీజ్ ఖాన్ లేఖలో ఘాటుగా స్పందించారు.

ఎస్వీ మోహన్‌రెడ్డి 2014 ఎన్నికల్లో వైసీపీ నుంచి ఎమ్మెల్యేగా గెలిచిన విషయం తెలిసిందే. అనంతరం ఆయన తెలుగు దేశం పార్టీలోకి ఫిరాయించారు. దీంతో హఫీజ్ ఖాన్‌ను పార్టీలోకి ఆహ్వానించిన వైసీపీ అధినేత, ముఖ్యమంత్రి వైఎస్ జగన్‌మోహన్‌రెడ్డి 2019లో ఆయనకే ఎమ్మెల్యే టికెట్ ఇచ్చారు. అయితే ఎన్నికలకు ముందు ఎస్వీ మోహన్‌రెడ్డి తిరిగి వైఎస్సార్‌సీపీలో చేరారు. అప్పట్లో తాను వైసీపీ సామాన్య కార్యకర్తగానే ఉంటానని చెప్పారు. ఈ నేపథ్యంలో ఎమ్మెల్యే హఫీజ్ ఖాన్ లేఖ ప్రాధాన్యం సంతరించుకుంది.