AP Chief Minister: 'ఏపీకి ముఖ్యమంత్రి ఎవరు.. వైఎస్ జగన్, విజయసాయిరెడ్డినా?'

ఆంధ్రప్రదేశ్ ముఖ్యమంత్రి వైఎస్ జగన్‌మోహన్‌ రెడ్డా.. ఎంపీ విజయసాయి రెడ్డా అంటూ ప్రశ్నించారు మాజీ మంత్రి దేవినేని ఉమామహేశ్వరరావు. ఏ అర్హతతో విజయసాయిరెడ్డి విశాఖలో కలెక్టర్, అధికారులతో సమీక్ష నిర్వహిస్తారో చెప్పాలన్నారు. అంతమంది ప్రభుత్వ అధికారుల మధ్య కూర్చొని రాష్ట్ర రాజధానిని ప్రకటిస్తారా అంటూ మండిపడ్డారు. విజయసాయికి ఏ అర్హత ఉందని రాజధాని ప్రకటన చేశారో చెప్పాలన్నారు.

Read Also: ఆ కేసులో బాబుని ఇరికించడం సాధ్యం కాదు.. వైసీపీ ఎంపీ సంచలన వ్యాఖ్యలు

ఎంపీ విజయసాయిరెడ్డి రాజధానిని ప్రకటిస్తే తమకు సంబంధం లేదని సాక్షాత్తూ మంత్రి చెప్పారని.. మరి ఏ అధికారంతో ఆయన రాజధానిని ప్రకటించారో చెప్పాలన్నారు దేవినేని. దీనిపై సీఎం జగన్ స్పందించాలని డిమాండ్ చేశారు. శుక్రవారం నిర్వహించిన కేబినెట్ సమావేశం చంద్రబాబును తిట్టడం కోసమే పెట్టినట్లుందన్నారు.. ప్రభుత్వాన్ని ప్రశ్నించిన టీడీపీ నేతలపై వైఎస్సార్‌సీపీ నేతలు నోటికొచ్చినట్లు మాట్లాడుతున్నారని మండిపడ్డారు.

విశాఖలో వైఎస్సార్‌సీపీ నేతలు, బంధువులు భారీగా భూములు కొనుగోలు చేశారని ఉమా ఆరోపించారు. భీమిలి, భోగాపురంలో వేల ఎకరాలు చేతులు మారాయని ఆరోపించారు..వైసీపీ నేతల ఇన్‌సైడ్‌ ట్రేడింగ్‌ చేశారని.. దీనిపై సీబీఐ విచారణకు సిద్ధమా అంటూ సవాల్ విసిరారు. సంక్రాంతి తర్వాత విశాఖకు రాజధాని తరలించేలా ప్లాన్ చేస్తున్నారని ఆరోపించారు.

జీఎన్ రావు కమిటీ నివేదికపైనా ఉమా మండిపడ్డారు. జీఎన్‌ రావు 100 మీటర్లు కూడా నడవలేరని.. 10‌వేల కిలోమీటర్ల నడిచారా అంటూ ప్రశ్నించారు. ఇక బోస్టన్ కన్సల్టెన్సీ గ్రూపుపై ఆరోపణలు ఉన్నాయని.. రాష్ట్ర ప్రజల భవితవ్యం నిర్ణయించే బాధ్యత అవినీతి కంపెనీకి అప్పగిస్తారా అంటూ మండిపడ్డారు. రాజధాని రైతులకు భయపడిన జగన్‌.. డమ్మీ కాన్వాయ్‌తో సచివాలయానికి వెళ్లారని.. సీఎం సచివాలయం రావడానికి ముళ్లకంచెలు, బారికేడ్లు అవసరమా అని ప్రశ్నించారు.