'ఇసుక మాఫియాలో ఏపీ మంత్రులకు వాటాలు'

ఏపీలో ఇసుక కొరతపై రగడ కొనసాగుతోంది. కొత్త పాలసీతో ఇసుక అందుబాటులోకి తెచ్చామని జగన్ సర్కార్ చెబుతుంటే.. ఇప్పటికీ కొరతతో భవన నిర్మాణ కార్మికులు కష్టాలు పడుతున్నారని టీడీపీ ఆరోపిస్తోంది. ఇసుక రేటు ఆకాశాన్ని తాకుతోందని.. రోజువారీ కూలీల కష్టాలు పట్టవా అంటూ ప్రశ్నిస్తోంది. తాజాగా మాజీ మంత్రి సుజయ్ కృష్ణ రంగారావు ఏపీ మంత్రులపై సంచలన వ్యాఖ్యలు చేశారు.

వైసీపీ కేడర్ కోసమే ప్రభుత్వం కొత్త ఇసుక పాలసీని తీసుకొచ్చిందన్నారు సుజయ్. ఇసుక మాఫియాతో మంత్రులు చేతులు కలిపారని.. వారికి వాటాలు అందుతున్నాయన్నారు. ప్రజల కష్టాల్ని పట్టించుకోకుండా జగన్ సర్కార్ నిర్లక్ష్యంగా వ్యవహరిస్తోందని.. సామాన్యులపై ఇసుక భారం మోపి భవన నిర్మాణ కార్మికులు రోడ్డెక్కేలా చేశారన్నారు. స్టాక్ పాయింట్లలో అవసరమైనంత ఇసుకను ఉంచలేకపోతున్నారని.. ప్రభుత్వం చెబుతున్న ఖర్చుకు ఇసుకను రవాణా చేసేందుకు ఎవరూ ముందుకు రావడం లేదన్నారు.

జగన్ సర్కార్ అమలు చేస్తున్నామని చెబుతున్న కొత్త ఇసుక విధానం పూర్తిగా విఫలమైందన్నారు మాజీ మంత్రి. టీడీపీ హయాంలో ప్రజలు నేరుగా ఇసుక రీచ్‌లకు వెళ్లి.. ట్రాక్టర్లు, ఎడ్ల బండ్ల ద్వారా రవాణా చేసుకునేవారని.. ఇప్పుడు పరిస్థితి పూర్తిగా మారిపోయిందన్నారు. ఇప్పటికైనా ప్రభుత్వం తీరు మార్చుకొని గత టీడీపీ ప్రభుత్వం అనుసరించిన ఇసుక పాలసీని అమలు చేయాలన్నారు. భవన నిర్మాణ కార్మికులకు తమ పార్టీ అండగా ఉంటుందని భరోసా నింపే ప్రయత్నం చేశారు.