జగన్ కూడా ట్రంప్‌లా.. మాజీ మంత్రి ఆసక్తికర వ్యాఖ్యలు

ఏపీలో స్థానిక సంస్థల ఎన్నికలపై రాజకీయం మరింత వేడిక్కింది. టీడీపీ-వైఎస్సార్‌సీపీ మధ్య మాటల యుద్ధం ముదురుతోంది. ఎన్నికల విషయంలో జగన్ సర్కార్ తీరుపై మాజీ మంత్రి యనమల రామకృష్ణుడు మండిపడ్డారు. ట్రంప్ తరహాలో జగన్ వ్యవహారం ఉందని.. అమెరికా రాజ్యాంగానికి విరుద్ధంగా ట్రంప్ వ్యవహార శైలి ఉంటే.. ఇక్కడ రాష్ట్రంలో భారత రాజ్యాంగాన్ని ధిక్కరిస్తూ ముఖ్యమంత్రి జగన్ ప్రవర్తన అలాగే ఉందని చురకలంటించారు. స్థానిక సంస్థల ఎన్నికలపై ప్రభుత్వ వితండ వాదన విడ్డూరంగా ఉందని ధ్వజమెత్తారు.

రాష్ట్ర ప్రభుత్వాన్ని సంప్రదించమంటే చెప్పింది చేయమని కాదని.. ఇలాంటి ముఖ్యమంత్రిని, వింత పార్టీని, వితండ ప్రభుత్వాన్ని దేశంలో ఎక్కడా చూడలేదన్నారు. న్యాయస్థానాల ఆదేశాలను సీఎం జగన్ అమలు చేయరని.. స్వయం ప్రతిపత్తితో ఎన్నికల సంఘాన్ని పని చేయనీయరన్నారు. జగన్ పాలనలో రాష్ట్రంలో నెపోటిజం, ఫేవరిటిజం తప్ప ఏమీ లేదన్నారు. ఏ అధికారంతో సీఎస్ ఎన్నికల సంఘాన్ని ధిక్కరిస్తున్నారో చెప్పాలన్నారు. ఎస్‌ఈసీకి రాష్ట్ర ప్రభుత్వం సహాయ నిరాకరణ రాజ్యాంగ వ్యతిరేకమని వ్యాఖ్యానించారు యనమల.