కుట్రపూరితంగానే కేసులో ఇరికించారు.. బెయిల్ కోసం హైకోర్టుకు జేసీ ప్రభాకర్ రెడ్డి

బీఎస్-3 వాహనాలను బీఎస్-4గా రిజిస్ట్రేషన్‌ చేయించారన్న ఆరోపణలపై జూన్ 13న అరెస్టయిన టీడీపీ మాజీ ఎమ్మెల్యే జేసీ ప్రభాకర్‌రెడ్డి, ఆయన కుమారుడు అస్మిత్‌రెడ్డిలకు కింది కోర్టును బెయిల్ నిరాకరించిన విషయం తెలిసిందే. తాజాగా, ఆయన బెయిల్ కోసం హైకోర్టును ఆశ్రయించారు. వాహనాల అక్రమ రిజిస్ట్రేషన్‌ కేసులో తమను కుట్రపూరితంగా ఇరికించారని జేసీ ప్రభాకర్‌రెడ్డి, ఆయన సతీమణి ఉమ, తనయుడు అస్మిత్‌రెడ్డి హైకోర్టులో పిటిషన్‌ దాఖలు చేశారు. అనంతపురం వన్‌టౌన్ పోలీసులు తమపై నమోదు చేసిన కేసును రద్దు చేయాలని, కేసులో తదుపరి చర్యలను నిలిపివేసేలా ఆదేశించాలని కోరారు.

ఈ వ్యాజ్యంపై హైకోర్టు న్యాయమూర్తి జస్టిస్‌ ఎం.గంగారావు శనివారం విచారణ జరిపారు. కేసుకు సంబంధించిన పూర్తి వివరాలు సమర్పించాలని పబ్లిక్‌ ప్రాసిక్యూటర్‌ను ఆదేశిస్తూ విచారణను సోమవారానికి వాయిదా వేశారు. తాడిపత్రి పట్టణ, గ్రామీణ పోలీసులు ఒకే అంశానికి సంబంధించి తమపై వేర్వేరు ఎఫ్‌ఐఆర్‌లు నమోదు చేశారని పిటిషన్‌లో పేర్కొన్నారు. ఈ కేసులోనూ తనను అరెస్ట్‌ చేసే అవకాశం ఉన్నందున న్యాయస్థానం జోక్యం చేసుకోవాలని అభ్యర్థించారు. నాగాలాండ్‌ వాహనాల విషయంలో అధికారుల నుంచి అనుమతి పత్రాలు పొందిన అంశంపై ఎఫ్‌ఐఆర్‌లు నమోదు చేయకుండా నిలువరించాలని విన్నవించారు.

కాగా, జేసీ ప్రభాకర్‌రెడ్డి, ఆయన తనయుడు జేసీ అస్మిత్‌రెడ్డిని విచారణ కోసం పోలీసులు శనివారం తమ కస్టడీకి తీసుకున్నారు. కడప సెంట్రల్ జైలు నుంచి అనంతపురం వన్‌టౌన్ పోలీసుస్టేషన్‌కు తరలించారు. వీరిని సోమవారం మధ్యాహ్నం వరకు స్టేషన్‌లోనే ఉంచి విచారిస్తామని డీఎస్పీ తెలిపారు. జేసీ ప్రభాకర్‌రెడ్డి సూచనల మేరకు బీఎస్-3ని బీఎస్‌-4 వాహానాలుగా మార్చి విక్రయించారనే ఆరోపణలతో తాడిపత్రికి చెందిన అంబటి నాగేశ్వరరెడ్డి, ఆకుల రమేశ్‌, గుత్తా సోమశేఖర్‌ను శనివారం అరెస్టు చేసినట్లు తాడిపత్రి డీఎస్పీ శ్రీనివాసులు తెలిపారు. వీరు గతంలో జేసీ సంస్థల్లో పనిచేసినవారే కావడం గమనార్హం.