ఏపీ: కరోనాతో ప్రముఖ బిర్యానీ హోటల్ నిర్వాహకుడు మృతి

ఏపీలో కరోనా కల్లోలం కొనసాగుతోంది. ఈ మహమ్మారి దెబ్బకు కర్నూలు, గుంటూరు, కృష్ణా జిల్లాలు వణికిపోతున్నాయి. ముఖ్యంగా ఇరుగు-పొరుగున ఉన్న గుంటూరు, కృష్ణా జిల్లాల పరిస్థితి దారుణంగా ఉంది. ఇదిలా ఉంటే.. గుంటూరులో ప్రముఖ బిర్యానీ హోటల్‌ నిర్వాహకుడు అనారోగ్యంతో చనిపోయాడు. అతడికి పరీక్షలు నిర్వహించగా పాజిటివ్ తేలింది. దీంతో అధికారులు అప్రమత్తమై మృతుడి కుటుంబసభ్యులతో పాటు ఆయనతో సన్నిహితంగా ఉన్నవారి వివరాలు ఆరా తీస్తున్నారు. ఇప్పటికే మృతుడి కుటుంబసభ్యులు, బంధువులను క్వారంటైన్ కి తరలించారు.. పరీక్షలు నిర్వహించేందుకు సిద్దమవుతున్నారు.

అతడికి మూడు రోజుల క్రితం కరోనా లక్షణాలు బయటపడ్డాయట. అతడ్ని ఫీవర్ ఆస్పత్రికి తరలించి పరీక్షల కోసం శాంపిల్స్ సేకరించారట. ఆరోగ్య పరిస్థితి ఆందోళనకరంగా ఉండటంతో గుంటూరు జీజీహెచ్‌కు తరలించారు. ఈలోపే ఆయన చనిపోగా.. రిపోర్టుల్లో కరోనా పాజిటివ్ తేలింది. బిర్యానీ హోటల్ నిర్వాహకుడి మరణం గుంటూరులో కలకలంరేపింది. అతడికి కరోనా ఎలా సోకిందో అధికారులు ఆరా తీస్తున్నారు. దీనికి సంబంధించిన పూర్తి వివరాలు తెలియాల్సి ఉంది.