కడపలో విషాదం: తండ్రి బలవన్మరణం.. తీవ్ర మనస్తాపంతో అక్కాచెల్లెళ్లు ఆత్మహత్య

కుమార్తెను అల్లుడు వేధించడంతో తీవ్ర మనస్తాపానికి గురైన ఓ తండ్రి సెల్ఫీ వీడియో తీసి ఆత్మహత్యకు పాల్పడితే.. ఆయన మరణాన్ని తట్టుకోలేక అతడి ఇద్దరు కుమార్తెలు బలవన్మరణానికి పాల్పడ్డారు. ఈ విషాదకర ఘటన కడప జిల్లా ప్రొద్దుటూరులో చోటుచేసుకుంది. ప్రొద్దుటూరు వైఎంఆర్ కాలనీకి చెందిన బాబురెడ్డికి ఇద్దరు కుమార్తెలు. పెద్ద కుమార్తెకు వివాహం కాగా.. ఆమెను అల్లుడు నిరంతరం వేధింపులకు గురిచేయడంతో బాబురెడ్డి తీవ్ర మనస్తాపానికి గురయ్యాడు.

దీంతో శుక్రవారం రాత్రి ఆయన తన ఇంట్లో ఉరేసుకుని ఆత్మహత్య చేసుకున్నాడు. పెద్ద కుమార్తెను అల్లుడు వేధించడం తట్టుకోలేకపోవడంతో తాను బలవన్మరణానికి పాల్పడుతున్నట్టు బాబురెడ్డి ఓ సెల్ఫీ వీడియో తీశాడు. తండ్రి ఆత్మహత్యకు పాల్పడటంతో తట్టుకోలేని ఆయన ఇద్దరి కుమార్తెలు రైలు కిందపడి ప్రాణాలు తీసుకున్నారు. ఎర్రగుంట సమీపంలోని తిప్పలూరురాణి రైల్వే ట్రాక్‌పై అక్కాచెల్లెళ్ల మృతదేహాలను గుర్తించారు.

ఈ ఘటనపై సమాచారం అందుకున్న పోలీసులు అక్కడకు చేరుకుని మృతదేహాలను స్వాధీనం చేసుకున్నారు. కేసు నమోదుచేసిన పోలీసులు దర్యాప్తు చేపట్టారు. కుటుంబ కలహాలతోనే ముగ్గురూ ఆత్మహత్యకు పాల్పడినట్టు ప్రాథమికంగా నిర్ధారించారు. మృతదేహాలను పోస్ట్‌మార్టం కోసం తరలించారు. అక్కతోపాటు ఇంజినీరింగ్‌ చదువుతున్న చెల్లి ప్రాణాలు తీసుకోవడం తీవ్ర విషాదాన్ని నింపింది.