ఏపీలో తొలి జీరో ఎఫ్‌ఐఆర్.. పోలీసులు గ్రాండ్ సక్సెస్

హైదరాబాద్ వెటర్నరీ డాక్టర్ హత్యాచార ఘటనతో జీరో ఎఫ్‌ఐఆర్ తెరపైకి వచ్చింది. దిశ ఘటనకు పోలీసుల అలసత్వం కూడా కారణమేనని.. దిశ తల్లిదండ్రులు ఫిర్యాదు చేసేందుకు పోలీస్ స్టేషన్‌కు వెళ్తే తమ పరిధి కాదంటూ పలు స్టేషన్ల చుట్టూ తిప్పారన్న ఆరోపణలొచ్చాయి. పోలీసుల నిర్లక్ష్యంపై పెద్ద ఎత్తున విమర్శలు వచ్చిన నేపథ్యంలో ఏపీ పోలీసు శాఖ అప్రమత్తమైంది. బాధితులు ఫిర్యాదు చేసేందుకు పోలీస్ స్టేషన్‌కు వస్తే తమ పరిధి కాదంటూ తిప్పిపంపడానికి వీల్లేదని.. జీరో ఎఫ్‌ఐఆర్‌ నమోదు చేసి తక్షణ చర్యలు చేపట్టాలని ఆదేశాలు జారీ చేసింది.

జీరో ఎఫ్ఐఆర్ తప్పనిసరిగా అమలు చేయాలని ఆదేశాలిచ్చిన రోజుల వ్యవధిలోనే ఏపీలో తొలి జీరో ఎఫ్ఐఆర్ నమోదైంది. రాజధాని అమరావతి పరిధిలో ఒక మిస్సింగ్ కేసులో కృష్ణా జిల్లా కంచికచర్ల పోలీసులు జీరో ఎఫ్ఐఆర్ నమోదు చేశారు. తమ కుమారుడు కనిపించడం లేదని వీరులపాడు మండలం రంగాపురానికి చెందిన రవినాయక్ కంచికచర్ల పోలీసులను ఆశ్రయించాడు.

Also Read: విశాఖలో లేడీ అరాచకం.. మరో మహిళపై యాసిడ్ పోసి పరారీ..

రంగాపురం గ్రామం తమ పరిధిలో లేకపోవడంతో కంచికచర్ల పోలీసులు జీరో ఎఫ్‌ఐఆర్ నమోదు చేసి వెంటనే గాలింపు చర్యలు చేపట్టారు. అందుకోసం ప్రత్యేకంగా రెండు బృందాలను రంగంలోకి దించారు. ఎట్టకేలకు పొరుగు రాష్ట్రం తెలంగాణలో బాలుడిని గుర్తించారు. సూర్యాపేట జిల్లా మిర్యాలగూడ మండలం వీరంపాడులో బాలుడు ఉన్నట్లు గుర్తించి పోలీసులు బాలుడిని తీసుకొచ్చి తల్లిదందండ్రులకు అప్పగించారు.

పోలీసుల తక్షణ చర్యలతో బాలుడి ఆచూకీ లభ్యమైందని.. అలసత్వం ప్రదర్శించకుండా జీరో ఎఫ్ఐఆర్ నమోదు చేసి వెంటనే గాలింపు చర్యలు చేపట్టిన కంచికచర్ల పోలీసులను పలువురు అభినందిస్తున్నారు. తొలి జీరో ఎఫ్ఐఆర్ సత్ఫలితాలను ఇవ్వడంతో హర్షం వ్యక్తమవుతోంది. అయితే బాధితుడి స్వగ్రామమైర రంగాపురం వీరులపాడు పోలీస్ స్టేషన్ పరిధిలోకి వస్తుందని సమాచారం.

Read Also: శ్రీశైలం ఘాట్‌రోడ్డులో ఘోర ప్రమాదం.. ఇద్దరు మహిళలు దుర్మరణం