YSRCP: కుప్పం వైఎస్సార్సీపీ ఇంఛార్జీ కన్నుమూత.. చంద్రబాబు సంతాపం

కుప్పం వైఎస్సార్సీపీ ఇంఛార్జీ, మాజీ ఐఏఎస్ చంద్రమౌళి అనారోగ్యం కారణంగా తుదిశ్వాస విడిచారు. గత కొంత కాలంగా క్యాన్సర్‌తో బాధపడుతున్న ఆయన. హైదరాబాద్ అపోలో ఆసుపత్రిలో చికిత్స పొందుతూ ప్రాణాలు వదిలారు. 2014, 2019 ఎన్నికల్లో టీడీపీ అధినేత చంద్రబాబు నాయుడుపై చంద్రమౌళి పోటీ చేశారు. కుప్పం చంద్రబాబుకు అడ్డా అని తెలిసినా ఆయన అక్కడి నుంచి పోటీకే ఇష్టపడ్డారు. చంద్రమౌళి మరణం పట్ల సీఎం వైఎస్ జగన్, డిప్యూటీ సీఎం నారాయణ స్వామితోపాటు టీడీపీ అధినేత చంద్రబాబు నాయుడు సంతాపం వ్యక్తం చేశారు. చంద్రమౌళి కుటుంబ సభ్యులకు ప్రగాఢ సానుభూతి తెలిపారు.

1990 బ్యాచ్ ఐఏఎస్‌ ఐఏఎస్ ఆఫీసర్ అయిన చంద్రమౌళి 2014 ఎన్నికల ముందు వైఎస్సార్సీపీలో చేరారు. 2014 ఎన్నికల్లో 55 వేల ఓట్లు సాధించిన చంద్రమౌళి.. 2019 ఎన్నికల్లో దాదాపు 70 వేల ఓట్లు సాధించి అందరి దృష్టి ఆకర్షించారు. చిత్తూరు జిల్లాకు చెందిన ఆయన బీసీ (వన్నెకుల క్షత్రియ) వర్గానికి చెందినవారు. కడప జిల్లా కలెక్టర్‌గా, సచివాలయంలో ప్రభుత్వ కార్యదర్శిగా పని చేశారు. ఎన్నికల ముందు నుంచే ఆయన క్యాన్సర్‌తో బాధపడుతున్నట్లు సమాచారం. 2019 ఎన్నికల్లో చంద్రమౌళిని గెలిపిస్తే.. ఆయన్ను మంత్రిని చేస్తానని జగన్ ప్రకటించారు.

2013లో ఆయన సెంటర్ ఫర్ డెవలప్‌మెంట్ స్టడీస్ (సీడీసీ) డైరెక్టర్ జనరల్‌గా చంద్రమౌళి బాధ్యతలు చేపట్టారు. ఆయన పొలిటికల్ ఎంట్రీకి జగన్ గ్రీన్ సిగ్నల్ ఇవ్వడంతో సీడీసీ నుంచి వైదొలిగారు. కుప్పంలో చంద్రబాబు సామాజిక వర్గానికి చెందిన వారి ఓట్లు 2 శాతం మాత్రమే ఉండగా.. చంద్రమౌళి సామాజిక వర్గం ఓట్లు 20 శాతం ఉండటంతో.. జగన్ ఆయన్ను వ్యూహాత్మకంగా కుప్పం అభ్యర్థిగా నిలిపారు. చంద్రబాబుపై గెలవలేకపోయినప్పటికీ.. ఆయన మెజార్టీని తగ్గించడంలో చంద్రమౌళి విజయవంతమయ్యారు.