ఏపీ: సీఎం సహాయ నిధి నుంచి రూ.112 కోట్లు కొట్టేసే ప్లాన్.. బయటపడ్డ కుంభకోణం

సీఎం సహాయ నిధి నుంచి వందల కోట్లు కొల్లగొట్టడానికి చేసిన ప్రయత్నం బ్యాంకు అధికారుల అప్రమత్తతో బెడిసికొట్టింది. బ్యాంకులను బురిడీ కొట్టించి సీఎం సహాయ నిధి నుంచి రూ.112 కోట్లు దోచేయడానికి కేటుగాళ్లు ప్రయత్నించారు. బ్యాంకు అధికారుల అప్రమత్తతో ఈ కుంభకోణం బట్టబయలయ్యింది. ఈ వ్యవహారంపై దృష్టి సారించిన పోలీసులు.. కేసు నమోదుచేసిన దర్యాప్తు చేపట్టారు. ఢిల్లీ, బెంగుళూరు, కోల్‌కత్తాలోని మూడు బ్యాంకుల ద్వారా కేటుగాళ్లు నగదుగా మార్చుకునేందుకు ప్రయత్నించారు

వీటిపై అనుమానం రావడంతో ఆయా బ్యాంకులు వెలగపూడిలోని ఎస్బీఐని సంప్రదించాయి. దీంతో వ్యవహారం బయటపడింది. బెంగళూరు సర్కిల్, మంగళూరులోని మూడ్‌బద్రి శాఖకు రూ.52.65 కోట్ల చెక్కు, ఢిల్లీలోని సీసీపీసీఐ కి రూ.39,85,95,540 చెక్కు, కోల్‌కత్తా సర్కిల్‌లోని మోగ్‌రాహత్‌ శాఖకు రూ.24.65 కోట్ల చెక్కులను క్లియరెన్స్‌ కోసం గుర్తుతెలియని వ్యక్తులు సమర్పించారు.

మూడు చెక్కులు విజయవాడ, ఎంజీ రోడ్‌ బ్రాంచ్‌కు చెందినట్లుగా సృష్టించారు. వాటిపై సీఎంఆర్‌ఎఫ్, రెవెన్యూ శాఖ, సెక్రటరీ టు గవర్నమెంట్‌ అన్న స్టాంప్‌ వేశారు. వీటిపై అధికారులు అనుమానం రావడంతో ఎస్బీఐని సంప్రదించాయి. ఢిల్లీ, బెంగళూరు, కోల్‌కత్తా సర్కిళ్లకు చెందిన బ్యాంకుల అధికారులు ఫోన్‌ చేయడంతో నకిలీ పర్వం బట్టబయలయ్యింది.