ఎల్వీ ఇచ్చిన నోటీసులపై.. ఇంఛార్జి సీఎస్‌కు వివరణ ఇచ్చిన ప్రవీణ్ ప్రకాష్

ఏపీ చీఫ్ సెక్రటరీ ఎల్వీ సుబ్రహ్మణ్యాన్ని బదిలీ చేయడం రాజకీయ వర్గాల్లో సంచలనమైన సంగతి తెలిసిందే. అసాధారణ రీతిలో ఆయన్ను బదిలీ చేసిన జగన్ సర్కారు.. ప్రాధాన్యం లేని పోస్టులో నియమించింది. దీంతో అలకబూనిన ఆయన బాధ్యతలను నీరబ్ కుమార్ ప్రసాద్‌కు అప్పజెప్పి.. నూతన బాధ్యతలు చేపట్టకుండానే సెలవులో వెళ్లారు. సీఎంవోలో పని చేస్తున్న జీఏడీ ముఖ్యకార్యదర్శి ప్రవీణ్ ప్రకాష్‌కు నోటీసులు ఇవ్వడమే.. ఎల్వీపై వేటు వేయడానికి కారణమని ప్రచారం జరిగింది.

చీఫ్ సెక్రటరీ అయిన తనకు చెప్పకుండా.. ప్రవీణ్ ప్రకాష్ సొంత నిర్ణయాలు తీసుకుంటున్నారనే కారణంతో ఎల్వీ ఆయనకు నోటీసులు ఇచ్చారు. కాగా ప్రవీణ్ ప్రకాష్ పేరిటే సుబ్రహ్మణ్యానికి బదిలీ ఉత్తర్వులు పంపారు.

ఎల్వీ బదిలీ అయ్యాక.. ఆయన స్థానంలో తాత్కాలిక సీఎస్‌గా బాధ్యతలు చేపట్టిన నీరబ్ కుమార్ ప్రసాద్‌కు వివరణ ఇచ్చారు. ఎల్వీ సుబ్రమణ్యం ఇచ్చిన నోటీసుపై వివరణ ఇస్తూ నీరబ‌్‌కు ప్రవీణ్ లేఖ రాశారు.

వైఎస్ఆర్ లైఫ్ టైం అచీవ్‌మెంట్ పురస్కారాలు, గ్రామ న్యాయాలయాల విషయంలో అంతా నిబంధనల ప్రకారమే చేశానని ప్రవీణ్ ప్రకాష్ లేఖలో పేర్కొన్నారు. అప్పటి సీఎస్ ఆదేశాల మేరకే తాను పని చేశానన్నారు. గ్రామ న్యాయాలయాల అంశాన్ని కేబినెట్ ముందుకు ఎందుకు తీసుకురాలేదో కూడా ఎల్వీకి వివరణ ఇచ్చానన్నారు.

Read Also: అసెంబ్లీ కమిటీలు.. వల్లభనేని వంశీకి ఛాన్స్

ఎల్వీకి వివరణ ఇచ్చానని.. అయినా పట్టించుకోకుండా నోటీసులు ఇచ్చారని ప్రవీణ్ ఆవేదన వ్యక్తం చేశారు. యుగంధర్ లాంటి వారి స్ఫూర్తితో ఏపీ కేడర్ పని చేస్తోందని ప్రవీణ్ ప్రకాష్ తెలిపారు. ప్రజలకు సత్వర న్యాయం అందేలా పనిచేయడం ఏపీ కేడర్ ప్రత్యేకత అన్నారు. ఆ స్ఫూర్తికి విరుద్ధంగా ఈ ఎపిసోడ్ బయటకు రావడం దురదృష్టకరమన్నారు.

Read Also: మందుబాబులకు షాక్ ఇచ్చిన జగన్!