చంద్రబాబుకు షాక్.. టీడీపీ పొలిట్‌బ్యూరో పదవికి గల్లా అరుణకుమారి రాజీనామా

టీడీపీ పొలిట్ బ్యూరో పదవికి మాజీ మంత్రి గల్లా అరుణకుమారి రాజీనామా చేశారు. వ్యక్తిగత కారణాలతో రాజీనామా చేస్తున్నట్లు తెలిపారు. టీడీపీ కొత్త కమిటీలను నియమిస్తున్న సమయంలోనే అరుణ రాజీమా చేయడం ఆసక్తికరంగా మారింది. ఆమె వ్యక్తిగత కారణాలని చెబుతున్నా.. మరే ఇతర కారణాలు ఉన్నాయా అనే చర్చ జరుగుతోంది. గల్లా అరుణ కుమారి కుమారుడు గల్లా జయదేవ్ ప్రస్తుతం గుంటూరు ఎంపీగా ఉన్నారు.

గల్లా అరుణ కుమారి వైఎస్ హయాంలో కాంగ్రెస్ పార్టీ నుంచి మంత్రిగా పనిచేశారు. నాలుగు సార్లు చిత్తూరు జిల్లా చంద్రగిరి నుంచి పోటీ చేసి గెలిచారు. రాష్ట్ర విభజన సమయంలో కాంగ్రెస్ పార్టీకి రాజీనామా చేసి టీడీపీలో చేరారు. ఆమె 2014లో చంద్రగిరి నుంచి మళ్లీ టీడీపీ తరపున పోటీ చేసి ఓడిపోయారు. తర్వాత ఆ నియోజకవర్గ బాధ్యతల నుంచి తప్పుకున్నారు. పులివర్తి నానికి పగ్గాలు అప్పగించారు. తర్వాత అరుణకు టీడీపీ పొలిట్ బ్యూరోలో అవకాశం కల్పించారు. ఇక ఆమె కుమారుడు జయదేవ్‌ను గుంటూరు ఎంపీ టికెట్ దక్కించుకుని 2014 ఎన్నికల్లో ఘన విజయం సాధించారు. తర్వాత 2019 ఎన్నికల్లో కూడా గుంటూరు నుంచి మళ్లీ ఎంపీ అయ్యారు.