జగన్‌ను కలిసిన టీడీపీ ఎమ్మెల్యే.. వెంటబెట్టుకెళ్లిన మంత్రి

టీడీపీ గన్నవరం ఎమ్మెల్యే వల్లభనేని వంశీ ముఖ్యమంత్రి జగన్‌తో సమావేశమయ్యారు. తాడేపల్లిలోని జగన్ నివాసంలో భేటీ అయ్యారు. వంశీని మంత్రి పేర్ని నాని వెంటబెట్టుకొని తీసుకెళ్లారని తెలుస్తోంది. వల్లభనేని జగన్‌ను కలవడంతో ఆయన పార్టీ మారతారనే ప్రచారం జరుగుతోంది. అందుకే జగన్‌ కలిశారా అనే ప్రశ్నలు తెరపైకి వస్తున్నాయి.

Read Also: BJP ఎంపీతో టీడీపీ ఎమ్మెల్యే భేటీ

అంతేకాదు వంశీ ఉదయం గుంటూరులో ఎంపీ సుజనా చౌదరిని కలిశారు. ఒంగోలు వెళుతూ గుంటూరులో ఆగిన సుజనాను కలిసిన వంశీ.. కొద్దిసేపు సమావేశమయ్యారు. తర్వాత ఒకే కారులో ఇద్దరూ కలిసి ఒంగోలు వెళ్లినట్లు తెలుస్తోంది. వంశీ సుజనానకు కలవడం.. సమావేశం కావడం.. ఒకే కారులో వెళ్లడం ఆసక్తికరంగా మారింది. వంశీ పార్టీ మారబోతున్నారా అంటూ మళ్లీ ప్రచారం మొదలయ్యింది.

వంశీపై కొద్ది రోజుల క్రితమే ఫోర్జరీ ఆరోపణలు వచ్చాయి.. పోలీసులు కేసు కూడా నమోదు చేశారు. తనపై ప్రభుత్వం తప్పుడు కేసులు పెడుతోందని వల్లభనేని చెప్పారు. ఈ క్రమంలో గురువారం అనుచరులు, అభిమానులతో నియోజకవర్గంలో సమావేశమయ్యారు. దీంతో ఆయన పార్టీ మారతారని సోషల్ మీడియాలో జోరుగా ప్రచారం జరిగింది.. ఆయన మాత్రం పార్టీ మారేది లేదని తేల్చి చెప్పారట. అంతేకాదు శుక్రవారం రాష్ట్రవ్యాప్తంగా టీడీపీ ఇసుక కొరతను నిరసిస్తూ ఆందోళనలు, ధర్నాలు చేపట్టింది. ఈ కార్యక్రమానికి కూడా వెళ్లకుండా వల్లభనేని సుజనాను, ఆ వెంటనే జగన్‌ను కలవడం ఆసక్తికరంగా మారింది.