గోదావరి బోటు ప్రమాద ఘటన.. ముగ్గురి అరెస్ట్

గోదావరి బోటు ప్రమాద ఘటనలో ముగ్గుర్ని పోలీసులు అరెస్ట్ చేశారు. బోటు యజమాని కోడిగుడ్ల వెంకటరమణతో పాటూ ఏ1.. ఏ-2 ఎల్లా ప్రభావతి, ఏ-3 అచ్యుతమణిని అరెస్ట్ చేసినట్లు రంపచోడవరం ఏఎస్పీ వకుళ్ జిందాల్ తెలిపారు. నిందితులపై వివిధ సెక్షన్ల కింద కేసు నమోదు చేశామని.. ఇంకా ఈ ఘటనకు సంబంధించి ఎవరెవరి ప్రమేయం ఉందో విచారణ జరుపుతున్నట్లు తెలిపారు. గోదావరిలో బోల్తాపడిన బోటులో మొత్తం 64మంది పెద్దవాళ్లు, ముగ్గురు చిన్నారులు ఉన్నారని ఏఎస్పీ తెలిపారు. అలాగే బోటు సిబ్బంది 8మందితో కలిపి 75మంది ఉన్నారన్నారు. బోటు డ్రైవర్‌ నది ప్రవాహ ఉధృతిని అంచనా వేయలేకపోవడం.. సుడుల నుంచి తప్పించడం.. సురక్షిత మార్గంలో బోటును తీసుకెళ్లడంలో అవగాహన, అనుభవం లేకపోవడమే ప్రమాదానికి కారణమన్నారు. ఎడమ పక్కకు వెళ్లాల్సిందిపోయి.. గోదావరి మధ్యలో నడిపారన్నారు.

ఈ ఘటనకు సంబంధించి పోలీసుల తప్పు లేదని.. పోలీసులు తనిఖీ చేసినప్పుడు బోటులోని వారంతా లైఫ్‌ జాకెట్లు వేసుకున్నారన్నారు. పోలీసులు వెళ్లగానే లైఫ్‌ జాకెట్లు తీసేసి ఉండొచ్చని.. బోటును బయటకు తీసుకొచ్చే ప్రయత్నాలు కొనసాగుతున్నాయన్నారు. ఇప్పటివరకూ 34 మృతదేహాలు వెలికి తీసినట్లు తెలిపారు.