గుంటూరులో ఆలయం కూల్చివేత.. జగన్ సర్కార్‌పై దుమ్మెత్తిపోసిన హిందూ సంఘాలు

కనకదుర్గమ్మ ఆలయాన్ని అర్ధరాత్రి వేళ కార్పొరేషన్ అధికారులు కూల్చివేశారు. రోడ్డు విస్తరణ పనుల్లో భాగంగా రోడ్డు పక్కన ఉన్న దేవాలయాన్ని రాత్రికి రాత్రే నేలమట్టం చేశారు. విషయం తెలుసుకున్న స్థానికి భక్తులు, హిందూ సంఘాల నాయకులు సంఘటనా స్థలికి చేరుకుని అధికారులపై ఆగ్రహం వ్యక్తం చేశారు. ఇష్టారాజ్యంగా గుడిని సైతం కూలగొట్టడాన్ని తీవ్రంగా తప్పుబట్టారు.

గుంటూరు నగరంలోని బస్టాండ్ వెనుక వైపు కొల్లి శారదా మార్కెట్ ఎదుట ఉన్న కనకదుర్గమ్మ దేవాలయాన్ని కార్పొరేషన్ అధికారులు నేలమట్టం చేశారు. గుంటూరు - నందివెలుగు రోడ్డు విస్తరణలో భాగంగా రహదారిని ఆనుకుని ఉన్న ఆలయాన్ని కార్పొరేషణ్ సిబ్బంది కూల్చేశారు. అర్ధరాత్రి వేళ పొక్లెయిన్లతో వచ్చిన సిబ్బంది అమ్మవారి ఆలయాన్ని నేలకూల్చారు.

Also Read: మందు తాగి లారీ ఎక్కిన డ్రైవర్.. విజయవాడలో బీభత్సం

విషయం తెలుసుకున్న స్థానిక భక్తులు, పలువురు హిందూ సంఘాల నాయకులు అక్కడికి చేరుకుని అధికారులతో వాగ్వాదానికి దిగారు. ఆలయ కూల్చివేతతో స్థానికులు తీవ్ర ఆగ్రహావేశాలకు లోనవడంతో కాస్త ఉద్రిక్త పరిస్థితులు ఏర్పడ్డాయి. కార్పొరేషన్ అధికారుల తీరుపై హిందూ సంఘాల ప్రతినిధులు మండిపడ్డారు. ప్రభుత్వ విధానాలపై తీవ్ర విమర్శలు గుప్పించారు.


హిందూత్వాన్ని ధ్వంసం చేయడమే ముఖ్యమంత్రి జగన్ పని పెట్టుకున్నారని హిందూ సంఘాల నేతలు సంచలన ఆరోపణలు చేశారు. గతంలోనూ పుష్కరాల పేరిట చంద్రబాబు నాయుడు వందల సంఖ్యలో దేవాలయాలను కూలదోశారని గుర్తు చేశారు. ఇప్పుడు జగన్ ప్రభుత్వం అదే బాటలో నడుస్తోందని దుయ్యబట్టారు. ప్రభుత్వం విధానాలు మార్చుకోకుంటే చంద్రబాబుకు పట్టిన గతే జగన్‌కి కూడా పడుతుందని తీవ్ర ఆగ్రహావేశాలు వ్యక్తం చేశారు.

Read Also: ఒకే ఒరలోకి రెండు కత్తులు.. రసవత్తరంగా బెజవాడ రాజకీయం